बिपि प्रतिष्ठानमा लकडाउन घोषणा

 धरान । अस्पताल भित्रै कोरोना संक्रमण भेटिए पछि धरान स्थित बीपी कोइराला स्वास्थ्य विज्ञान प्रतिष्ठानमा लकडाउन घोषणा गरिएको छ । प्रतिष्ठान ले बुधबार सुचना जारी गर्दै अर्को सूचना जारी नहुन्जेलसम्म लकडाउन गरिएको जानकारी गराएको छ । प्रतिष्ठानमा कार्यरत शिक्षक, कर्मचारी र विद्यार्थी लगायत सम्बद्ध सबै पक्षहरूले अनिवार्य रूपमा लकडाउन पालना गर्नु गराउनु र कहीँ कसैले यसको उल्लङ्घन गरेको पाइएमा कानुन बमोजिम कारबाही हुने उल्लेख गरिएको छ ।

प्रतिष्ठानमा आवास र छात्रावास प्रयोग गरी बसोबास गर्ने सम्पूर्ण शिक्षक, कर्मचारी तथा तीनका आश्रित परिवार लगायत विद्यार्थीहरूलाई अत्यावश्यक काममा बाहेक आफ्नो आवास बाहिर नजान सूचित गरिएको छ ।

प्रतिष्ठानको हाताभित्रको खेलमैदान, सडक र अन्यत्र हिँडडुल गरेको पाइएमा सुरक्षाकर्मीद्वारा कारबाही गरिने पनि सूचनामा उल्लेख गरिएको छ । यसैगरी प्रतिष्ठानका शिक्षक,कर्मचारी लगायत विद्यार्थीहरूले प्रतिष्ठान बाहिर अन्यत्र स्थान जिल्ला जानु परेमा प्रतिष्ठानबाट पूर्व स्वीकृति लिएर मात्र जानु पर्ने छ । पूर्व स्वीकृति नलिई गएको पाइएमा कानुन बमोजिम कारबाही हुनेछ ।