सुनसरी । सुनसरीको इनरुवा घर भएका पुरुषमा कोरोना संक्रमण पुष्टि भए पछि जिल्ला प्रशासन कार्यालय सुनसरीले इनरुवा नगरपालिकामा पुर्ण रुपमा लकडाउन घोषणा गरेको छ ।
नेपाल प्रहरीमा कार्यरत इनरुवा वडा नम्बर ३ घर भएका सुरक्षाकर्मीमा कोरोना संक्रमण पुष्टि भए पछि नगरपालिकालाई लकडाउन घोषणा गरिएको हो । उनको मोरङ जिल्ला कार्यक्षेत्र रहे पनि घरमा आउँजाउँका क्रममा अन्यमा पनि कोरोना संक्रमण फैलिएको हुन सक्ने बताउँदै जिल्ला प्रशासन कार्यालय सुनसरीका प्रमुख फडिन्द्रमणी पोखरेलको अध्यक्षतामा बसेको आकस्मीक बैठकले लकडाउनको घोषणा गरेको हो ।
संक्रमित पुरुष सँगको कन्ट्याक टे«सिङका आधारमा इनरुवामा लक डाउन गर्ने निर्णय गरिएको सुनसरी प्रशासनले जनाएको छ । इनरुवा ३ घर भएका व्यक्ति कार्यालय आउजाउका क्रममा परिवारसँगको सम्पर्कमा आएको आधारमा क्लोज कन्ट्याकको अवस्था पहिचान गर्न थालिएको छ ।
स्वास्थ्य कार्यालय सुनसरीका प्रमुख सागर प्रसाईका अनुसार परिवार सहित १२ जनाको ट्रेसिङ गरिएको छ । उनीहरुको स्वाब लिएर परिक्षण गर्ने तयारी थालिएको प्रसाईले जानकारी दिए । घर आउँजाउँ गरेको र छरछिमेकमा घुमफिर र बजार पसलमा पुगेको जस्ता विषय अध्ययन गरी ट्रेसिङको काम जारी रहेको स्वास्थ्य कार्यालयले जनाएको छ । कोरोना पोजेटिभ पाइएका व्यक्ति इनरुवाको मूख्य बजारमा रहेको दुर्गा स्टोरमा किनमेलका लागि पुगेको खुलेकाले उक्त पसल तत्कालका लागि सुनसरी प्रशासनले सिल गरेको छ ।
संक्रमित सँगको सम्पर्कका आधारमा स्टोरका केही व्यक्तिहरुको समेत पिसिआर परिक्षण गरिने प्रशासनले तयारी थालेको छ । बैठकले मूख्य बजार क्षेत्र सहित इनरुवाका सबै वडाबाट नमूनाका रुपमा पिसिआर परिक्षण गर्ने समेत निर्णय गरेको छ ।
