कोरोना मुक्त जिल्ला घोषणा गरेको केही दिनमै धनकुटामा ३ जनामा कोरोना संक्रमण

धनकुटा / सरकारले धनकुटालाई कोरोना मुक्त जिल्ला घोषणा गरेको केही दिनमै धनकुटामा ३ जनामा कोरोना संक्रमण भएको पुष्टि भएको छ ।

धनकुटाको छथर जोरपाटी गाउँपालिकाका २ जना र सहिदभूमि गाउँपालिकामा १ जना गरी ३ जनामा कोरोना संक्रमण पुष्टि भएको हो । कोरोना पुष्टि भएकामा छथर जोरपाटीका ३८ र ३९ वर्षका पुरुष र सहिदभूमिका ८ वर्षका पुरुष रहेको स्वास्थ्य कार्यालय धनकुटाका प्रमुख तुलसी प्रसाद गुरागाईले बताए । संक्रमितहरु छथर जोरपाटीका बहराइन र साउदीबाट आएका हुन् भने सहिदभूमिका कतारबाट १४ दिन अगाडि आएका हुन् ।

उनीहरु सम्बन्धित गाउँपालिकाले निर्माण गरेको क्वारेन्टाइनमा बस्दै आएका थिए । विदेशबाट आएर सहिदभूमिको क्वारेन्टाइनमा बसेका ७ जनाको पिसिआर परिक्षण गर्दा १ जनामा र छथर जोरपाटीको क्वारेन्टाइनमा बसेका २५ जनामा पिसिआर परिक्षण गर्दा २ जनामा कोरोना पुष्टि भएको प्रमुख गुरागाईले बताए । छथर जोरपाटीका २५ जनाको गत शुक्रबार र सहिदभूमिका ७ जनाको गत शनिबार पिसिआर स्वाब संकलन गरी विपी कोईराला स्वास्थ्य विज्ञान प्रतिष्ठान धरान पठाईएको थियो ।

कोरोना संक्रमण पुष्टि भएका तीनै जनालाई उपचारका पूर्वाञ्चल विश्व विद्यालयको आईसोलेशनमा पठाईने प्रमुख गुरागाईले बताए । धनकुटामा यसअघि ८ जनालाई कोरोना संक्रमण पुष्टि भएको थियो । उनिहरु सबै जना उपचार पछि निको भएर घर फर्किसकेका छन् ।