_1693980289.gif "#")
सुनसरी । कसैको लागी सप्तकोशी नदी पिडा र चिन्ता बनेको छ भने कसैलाई आम्दानीको स्रोत बनेको छ । वर्षा याम सुरु भएसँगै ज्यानको कुनै प्रवाह नगरि कोशीमा बाढीले बगाएर ल्याएका दाउरा संकलन गर्न स्थानीयहरुलाई यतीवेला भ्याइनभ्याइ छ ।
घरमा आर्थिक अभावका कारण दाउरा संकलनका लागि कोशी ब्यारेज आसपासका स्थानीयहरु वर्षौ देखी जोखिम मोल्दै आएका छन । कोशी व्यारेजमा खोलिएका ढोकामाथि दैनिक उनीहरु लठ्ठीमा भाला उनेर आफैले बनाएको घरेलु औजारको सहायताले बाढीले बगाएर ल्याएको दाउरा निकाल्ने गर्दछन् । बच्चै देखि कोशीमै हुर्किएकोले कुनै पनि डर नलाग्ने भन्दै दाउरा निकाल्ने काम व्यस्त हुने गरेको स्थानीय मिन्टु मण्डल बताउँछन् । उनी भन्छन्, ‘हामीलाई डर लाग्दैन्, यही हुर्किएको हो, यही खेलेको के को डर, पौडी खेल्न आउँछ, हाम्रो रोजिरोटी नै दाउरा, माछा हो कोशीको, अन्त जाने ठाउँ छैन् ।’
कोशीमै जन्मिई हुर्किएकाले सानो तिनो बाढीबाट नडराउने उनीहरु बताउँछन । बाढीले बगाएर ल्याएको काठ दाउरा निकाल्दा कहिले काँही पुलबाटै झर्ने गरेका छन् तर पौडा खेल्न आउने भएकाले कुनै किसिमको अप्रिय घटना नघटेको बताउँछन् । दाउरा संकलनको लागी १५ सय भन्दा वढी मानीसहरु कोशी व्यारेजमा आउने गर्दछन ।
दिनभरी संकलन गरेको काठ दाउरा घरमा लगेर सुकाउने र बजारमा लगेर बिक्री गर्ने गरेको स्थानीय गुल्टेन मण्डलको भनाई छ । उनका अनुसार वर्षाको समयमा एक जनाले २ ट्रक सम्म दाउरा संकलन गर्ने गर्दछन् । त्यही बेचेर गुजारा पनि टार्ने गरेको उनको भनाई छ । उनले भने, ‘कोशी वरिपरि खेती किसानी पनि हुँदैन्, के गरेर जिविकोपार्जन गर्नु, हाम्रो त काम नै यही हो, कोशी दाउरा निकाल्ने, माछा निकाल्ने खाने ।’
कोशी व्यारेजबाट निकालिएको काठ दाउरा भारतीय बजारसम्म लगेर बिक्री गरिदै आएको छ । बाढीको समयमा काठ दाउरा संकलन गरी घरमै थुपारेर राख्ने र हिउँदमा भारतीय बजारसम्म लगेर बिक्री गर्ने गर्दछन ।
