सुरक्षित नागरिक आवास कार्यक्रम अन्तरगत धनकुटाको साँगुरीगढी मा आवश्यक सामग्री वितरण

धनकुटा/ सुरक्षित नागरिक आवास कार्यक्रम अन्तरगत धनकुटाको साँगुरीगढी गाउँपालिकामा आवास निर्माणको लागि आवश्यक सामग्री वितरण गर्न शुरु गरिएको छ ।

संघीय सरकारको सुरक्षित नागरिक आवास कार्यक्रम अन्तरगत साँगुरीगढी गाउँपालिकाको दुई वटा वडामा जस्तापाता लगायतका सामग्रीहरु वितरण गर्न शुरु गरिएको हो । संघीय सांसद राजेन्द्र राईको पहलमा सो गाउँपालिकाको वडा नं. ७ र ८ का विपन्न ५० घरधुरीलाई सुरक्षित आवास निर्माणको लागि आवश्यक सामग्रीहरु खरिद गरेर वितरण गर्न शुरु गरिएको गाउँपालिकाका उपाध्यक्ष विन्द्रा राईले बताईन् । गाउँपालिकाको फुसको छाना रहित अभियानसँग जोडेर सुरक्षित नागरिक आवास कार्यक्रमलाई अगाडी बढाएको गाउँपालिकाले जनाएको छ ।

सुरक्षित नागरिक आवास कार्यक्रम अन्तरगत सो गाउँपालिकाको वडा नं. ७ मा २५ वटा र वडा नं. ८ मा २५ वटा आवास निर्माण भईरहेका छन् । आवास निर्माणको लागि संघीय सरकारले ५० हजार रुपैँया रकम उपलब्ध गराएको छ । पहिलो किस्ता वापत प्राप्त भएको ३० हजारले जस्तापाता ३२ एमएमको ३ बण्डिल, मगडा २४ फुट, काँटी ३ केजी, वासर ७ पोका खरिद गरेर वितरण गरिएको वडा नं. ८ का वडाध्यक्ष बिनय राईले बताए । आवास निर्माण कार्य अन्तिम चरणमा पुगेपछि बाँकी अन्तिम किस्ता भुक्तानी हुने वडाध्यक्ष राईले बताए । विगतका वर्षहरुमा संचालित जनता आवास कार्यक्रम धनकुटामा प्रभावकारी बन्दै गएको छ ।