_1693980289.gif "#")
विराटनगर । प्रदेश १ का विभिन्न जिल्लामा भएका दुर्घटनामा तीन जनाको मृत्यु भएको छ ।
मोरङको धनपालथान गाउँपालिका–५ मा ट्याक्टरमा खेतमा काम गर्दै गरेका स्थानीय २२ बर्षीय मो.सजाद मियाको मृत्यु भएको छ ।
धनपालथान गाउँपालिका वडा नम्बर ६ का लखना रायको खेत जोज्दै गर्दा को २ त ६२१८ नम्बरको ट्याक्टर अचानक पल्टिई मियालाई चेपेको थियो । घटनाबारे छानबिन थालिएको प्रदेश १ प्रहरी कार्यालय विराटनगरले जनाएको छ । चालक र ट्याक्टर प्रहरीले नियन्त्रणमा लिएको छ ।
उता,धनकुटाको साँगुरीगढी गाउँपालिका ६ कार्की छापमा ट्रक दुर्घटना हुँदा चालकको मृत्यु भएको छ । सोमवार राति विराटनगरबाट धनकुटातर्फ जाँदै गरेको को १ ख ४३६६ नम्बरको ट्रक अनियन्त्रीत भई दुर्घटना हुँदा सडक नजिकै रहेको कल्पना सुब्बाको घरलाई समेत क्षति पुर्याइ सडकबाट अन्दाजी ५० मिटर तल खस्दा ट्रक चालक मोरङको सुन्दरहरैचा नगरपालिका ९ का २९ बर्षीय राजु श्रेष्ठको घटनास्थलमा नै मृत्यु भएको जिल्ला प्रहरी कार्यालय धनकुटाले जनाएको छ ।
यसैगरी झापाको भद्रपुर नगरपालिका १० का २६ वर्षीय राम हेमरनको करेन्ट लागेर मृत्यु भएको छ । सेती खोलामा करेन्ट लगाई माछा मार्ने क्रममा अचानक आफैलाई करेन्ट लाग्दा हेमरनको घटनास्थलमा नै मृत्यु भएको थियो ।
