धरान नगरसभाको बाटो खुल्यो " आज निति तथा कार्यक्रम सार्वजनिक हुने पुर्ण बजेट केही दिन पछि"

धरान । वडासमितीमा जाने बजेटको सिलिङ पारित भए पछि धरान उपमहानगरपालिकाको नगरसभाको बाटो खुलेको छ ।

नगरसभाको अन्तिम तयारीका लागि मंगलबार बसेको बैठक नेकपा निकट वडाअध्यक्षहरुले बहिष्कार गरे पछि नगरसभा अन्यौलमा परेको थियो । मंगलबारको बैठकमा भएको घटना प्रति मेयर तिलक राईले आत्माआलोचना गरे पछि बुधबार बिहान पुनः बसेको कार्यपालिका बैठकले निति तथा कार्यक्रम पारित गरे पछि आज बस्ने नगरसभाको लागि बाटो खुलेको हो । धरान उपमहानगरपालिकाको नगरसभा दिउँसो वीपी कोइराला स्वास्थ्य विज्ञान प्रतिष्ठानको अडीटरियम हलमा हुने भएको छ ।

बजेटको स्रोत अनुमान समितीले पेश गरेको सुत्रमा आधारित बजेट पास भएर नगरसभामा लैजान पारित भएको वडा नम्बर १५ का वडाअध्यक्ष नरेश इवारुमले बताए । नगरसभाको उदघाटन सत्रमा दुई वटा कुरा लिएर जाने सहमती भएको उनको भनाई छ ।

मंगलबार बसेको बैठकमा नेकपा निटक वडाअध्यक्षहरुले दिएको बजेट सिलिङको सुझाव नेपाली कांग्रेस निकट वडाअध्यक्षले च्यातिदिए पछि बैठक अवरुद्ध भएको थियो । आज बसेको बैठकले सोही सिलिङको आधारमा वडामा बजेट सिलिङ जाने भए पछि नगरसभामा निति तथा कार्यक्रम जाने निर्णय भएको उनको भनाई छ । उनले भने, ‘हिजो केही साथीहरुले नबुझेको आधारमा च्यातिएको देखियो, आज मसिनो रुपमा अध्ययन गर्दा सबैजना सहमत भएका छन् ।’ ७४ मै बनेको सिलिङको आधारमा बजेट बनाउने सहमत भएको उनले बताए ।

उनको अनुसार आजको कार्यपालिका बैठकले १ अर्ब ७२ करोडको बजेट प्रक्षेपण पारित भएको छ । प्रक्षेपण गरिएको बजेटमा नगरगौरबका आयोजनाहरु केही क्रमागत आएका छन् भने केही नयाँ योजनाहरुलाई प्राथमिकता दिइएको उनले बताए ।

आज नगरसभामा निति तथा कार्यक्रम सार्वजनिक र नगरसभाको उदघाटन मात्रै हुनेछ भने वडामा गएको बजेटको सिलिङको आधारमा ब्रेकडाउन भए पछि पुनः केही दिन पछि बस्ने नगरसभाले पुर्णरुपमा पास गरेर जाने तयारी भएको छ ।

सिलिङको विषयमा मेयरले प्रस्तुत गरिसके पछि पोहोर साल ६६/६७ को बजेट २४ करोडको यसपालि २२ करोड हुँदा केही बुझाईमा फरक परेकोले समस्या भएको नेपाकी कांग्रेस निकट वडाअध्यक्ष माधवगोविन्द श्रेष्ठले बताए । आजको नगरसभाले वडाको बजेट सिलिङ पारित गरेर पठाए पछि वडाले पठाएको बजेटको आधारमा नगरको पुर्ण बजेट आउने उनले बताए ।