कालाबन्जर / भारतबाट सिधै घर आइपुगेका सुनसरीको वराहक्षेत्र ४ दुब्याही टोलका १ युवकलाई क्वारेन्टाइन पठाइएको छ ।
भारतको गुजरातमा मजदुरी गर्दै आएका उनी ५ दिन अगाडि सुनौली बोर्डर आइपुगेको बताउँछन् ।
उनले भने ‘कसैले खोजी खबर गरेन घरसम्म आउने आधार केही नभेटेपछि ७ जना मिलेर ६ हजारका दरले भाडा तिरेर आएका हौ ।’ उनीसँगै आएका मध्ये २ जना सप्तरीमा झरेका छन् भने अर्का १ जना सुनसरीको झुम्कामा र अरु ३ जना मोरङको सुन्दर हरैंचा गएका छन् ।
यसरी अव्यवस्थित रूपमा घरमै आइपुग्दा सुरक्षा व्यवस्था हेरेर आश्चर्यमा परेको सोही वडाका अध्यक्ष आशाराम चौधरीले बताउँछन् । उनले भने ‘मैले सिडियो साब लगायत माथिल्लो निकायमा खबर गरिसकेको छु यसरी मान्छे किन छोडियो ?’
ती युवकलाई वडा अध्यक्षको उपस्थितिमा एम्बुलेन्सबाट वराहक्षेत्रस्थित महेन्द्र माविमा रहेको क्वारेन्टाइनमा पठाइएको छ ।
