_1693980289.gif "#")
धरान । लकडाउनको मोडालिटी परिवर्तन गर्नुपर्ने माग बढ्दै गए पछि धरानले समय तालिका बनाएर बजार खोल्ने निर्णय गरेको छ ।
केही दिन अघि सुनसरी उद्योग वाणिज्य संघमा बसेको धरान उपमहानगरपालिका सहित व्यवसायीहरुको छलफलमा लकडाउनको विषयमा अध्ययन गर्न समिती गठन गरेको थियो । पुर्व मेयर मनोज कुमार मेन्याङबोको संयोजकत्वमा बनेको समितीले साँझ ६ बजे सम्म बजार खोल्न प्रस्ताव पेश गरे पनि धरानको सुरक्षा समितीको बैठकले दिउँसो २ बजे सम्म मात्र बजार खुल्ने निर्णय गरेको छ ।
शनिबार बिहान धरान उपमहानगरपालिकामा प्रमुख जिल्ला अधिकारी, वीपी प्रतिष्ठानका चिकित्सकहरु सहित प्रदेश तथा संघीय संसदहरु बिच भएको छलफलमा नगरपालिकालाई उद्योग वाणिज्य संघ बिच बैठक बसि निर्णय गर्न म्याण्डेट दिएको थियो । सोही अनुसार बसेको बैठकले २ सिफ्टमा बजार खुलाउने निर्णय गरेको छ ।
बैठकले तरकारी र खाद्यान्न पसल बिहान ६ बजेदेखि १० बजेसम्म खोल्न दिने निर्णय गरेको छ भने बिहान ९ बजेदेखि दिउँसो २ बजेसम्म अन्य पसलहरु खोल्न पाउनेछ ।
तर, सामाजिक दुरी कायम नहुने ब्युटीपार्लर, सैलुन, होटलहरु भने खोल्न नपाइने बैठकको निर्णय छ । खुलेका पसलहरुले अनिवार्य सुरक्षा अपनाउनु पर्ने र सामाजिक दुरी कायम गर्नु पर्ने संघका अध्यक्ष गिरीधारी सापकोटाले बताए ।
बैठकले बैंक तथा बित्तिय संस्थाहरु प्रत्येक दिन नै खोल्ने निर्णय पनि गरेको छ भने टेम्पो, सफारीहरु संचालन नगर्ने निर्णय गरेको छ ।
