धरान । प्रदेशको आगामी आर्थिक वर्षमा धरान उपमहानगरपालिकाको लागि २ अर्ब ३ करोडको योजनाहरुको माग गर्दै नेपाल कम्युनिष्ट पार्टी (नेकपा) धरानले प्रदेश सरकारलाई मागपत्र पेश गरेको छ ।
धरानको लागि विभिन्न १ सय ५ योजनाहरुका लागि २ अर्ब ३ करोड २५ लाख रुपैयाको बजेट विनियोजन गर्न माग गरिएको नेकपाका जिल्ला सदस्य एवं धरान नगर इञ्चार्ज चोत्लुङले बताए ।
नेकपाको धरानमा भएका केन्द्र, प्रदेश, जिल्ला र उपमहानगर स्तरका नेता तथा प्रदेश संसद, जनप्रतिनिधी सहितको टोलिले विराटनगर पुगेर प्रदेश सरकारका मुख्यमन्त्री कार्यालय सहित सबै मन्त्रालयमा आफ्ना योजनाहरु पेश गरेको छ ।
धरानको दीर्घकालिन विकासको लागि बहुबर्षीय, क्रमागत र उच्च प्राथमिकताको योजनाहरुलाई सोही अनुसार वर्गीकरण गरेर प्रदेश सरकारका मन्त्रीहरुलाई पेश गरेको इञ्चार्ज चोत्लुङले बताए ।
नेकपाको टोलीले आर्थिक मामिला तथा योजना मन्त्री इन्द्र आङ्बो, उद्योग पर्यटन वन तथा वातनवरण मन्त्री जगदिस कुसियत, भौतिक पुवार्धार विकास राज्यमन्त्री अमिरबाबु गुरुङलाई भेटेर माग पेश गरेका थिए भने मुख्यमन्त्री र आन्तरिक मामिला तथा कानुन मन्त्रालयमा माग दर्ता गरिएको उनले बताए ।
