उदयपुरमा भेटिएका कोरोना संक्रमित निको भएर घर फर्किए

धरान । उदयपुरको भुल्केमा भेटिएका कोरोना संक्रमितहरु मध्ये ८ जना निको भएर घर फर्किएका छन् ।
उनीहरुको रिपोर्ट नेगेटिभ देखिएले शुक्रबार डिस्चार्ज गरिएको हो । कोरोना भाइरस संक्रमण भएर विराटनगरको कोसी अस्पतालमा भर्ना भएका मध्ये ८ जना डिस्चार्ज भएका हुन् । दुई पटकसम्मको स्वाब परीक्षण रिपोर्ट नेगेटिभ देखिएपछि ७ नेपाली र एक भारतीय गरी ८ जना डिस्चार्ज भएका हुन् ।
कोरोना निको भएर घर फर्किने सबैजना उदयपुर, त्रियुगा नगरपालिका–३, भुल्केबाट संक्रमित भएर अस्पताल भर्ना भएका थिए । डिस्चार्ज भएका ७ जना पुरुषलाई विराटनगर रानीस्थित मस्जिदको क्वारेन्टाइनमा राखिएको र एक महिलालाई घरमै क्वारेन्टाइनमा बस्ने गरी पठाइएको बताइएको छ ।
पहिले निको भएर घर फर्किएका मध्ये ३ जनामा पुनः कोरोना देखिएपछि अस्पताल भर्ना भएका छन् । यसअघि गत बुधबार ६ जना भारतीय नागरिक कोशी अस्पतालबाट डिस्चार्ज भएका थिए । यससँगै नेपालका कोरोना संक्रमितको संख्या १०१ मध्ये निको भएर फर्कनेको संख्या २७ पुगेको छ ।