फेसबुक पेजमा परीक्षाफल प्रकाशित गर्दै विद्यालय

सामुदायिक तथा निजी विद्यालयहरुले गत चैत्र ५ गते सम्पन्न गरेको शैक्षिक सत्र २०७६ को परीक्षाफल सामाजिक सञ्जाल फेसबुक पेजमार्फत प्रकाशन गरेका छन् ।

कोरोना भाइरसको संक्रमणको विषम परिस्थितिमा परीक्षाफल प्रकाशित गर्नुपर्ने विद्यालयहरुको कर्तव्य रहेकाले नतिजा प्रकाशन गर्नुपरेको वराहक्षेत्रस्थित हिमालयन इङ्लिस स्कुलका प्रिन्सिपल आलोक श्रेष्ठले जानकारी दिए ।

चतरास्थित हिमालयन इङ्लिस स्कुलसँगै, वराह राइजिङ स्टार इङ्लिस स्कुल, आइरिस वराह एकेडेमीलगायतका विद्यालयले फेसबुकमार्फत परीक्षाफल प्रकाशित गरेका छन् ।
स्थानीय केही सामुदायिक विद्यालयहरुले समेत फेसबुक पेजमार्फत् परीक्षाफल प्रकाशित गरिरहेका छन् ।

कक्षा ८ को नतिजा नगर शिक्षा समितिबाट प्राप्त भएपछि प्रकाशन गरिने विद्यालयहरुको भनाइ छ । एसईई परीक्षा राष्ट्रिय परीक्षा बोर्डको निर्णयबमोजिम सञ्चालन हुने भएकाले सबै विद्यार्थीलाई तयारी अवस्थामा बस्न पनि विद्यालय प्रशासनहरुले आग्रह गरेका छन् ।

कोरोना भाइरसको सङ्क्रमणको जोखिम न्यूनीकरण गर्न सरकारले सबै शैक्षिक संस्था बन्द गरेपछि विद्यालय औपचारिक रुपमा कहिले सञ्चालन हुने भन्ने अनिश्चित छ । केही कलेजले आफ्ना विद्यार्थीलाई इन्टरनेटको माध्यमबाट अध्यापन गर्न थालेका छन् ।

निर्धारित समयमै कोर्स सक्न कठिन हुने भन्दै विद्यार्थीलाई अध्ययनमा व्यस्त राख्न समेत अनलाइनबाट पढाउन र विभिन्न क्रियाकलापमा सहभागी गराउन थालिएको छ । तर विद्यालयस्तरमा भने इन्टरनेटको पहुँचलगायत कठिनाइ भएका कारण अनलाइन शिक्षा प्रभावकारी नहुने शैक्षिक व्यक्तित्वहरुको मत छ ।