धरान/ सुनसरीको धरान–१६ स्थित पौडेल चोकमा लागूऔषध कारोबार भइरहेको भन्ने गोप्य सूचनाका आधारमा इलाका प्रहरी कार्यालय धरानबाट खटिएको प्रहरी टोलीले पाँच जनालाई लागूऔषधसहित पक्राउ गरेको छ।
बुधबार राति करिब ८:३० बजे शंकास्पद रूपमा रहेका उनीहरूलाई जाँच गर्दा ट्रामोल ३१३, एसएपीएसपीएइनफ्री १९५, एसपीएएसपीएइनप्रो १०० र एसपीएएसरेस्ट १८ गरी जम्मा ६२६ ट्याब्लेट तथा क्याप्सुल बरामद भएको प्रहरीले जनाएको छ।
पक्राउ पर्नेमा धरान–१३ का २२ वर्षीय अनिष तामाङ, १८ वर्षीया प्रतिमा राजधामी, धरान–१६ का १८ वर्षीय निराजन तामाङ, पाँचथर फिदिम–१ का २१ वर्षीय पुरप राना मगर र २१ वर्षीय अबिनाष थापा मगर रहेका छन्।
प्रहरीले उनीहरूलाई बरामद लागूऔषधसहित नियन्त्रणमा लिई इलाका प्रहरी कार्यालय धरानमा राखेर घटनाबारे थप अनुसन्धान गरिरहेको जनाएको छ।
