धरान/ धरान–१५ स्थित हिबिस्कस इङ्लिस बोर्डिङ स्कुलमा शुक्रबार उत्साहपूर्ण वातावरणबीच अन्तरसदन स्पेलिङ कन्टेस्ट (हिज्जे प्रतियोगिता) सम्पन्न भएको छ।
विद्यार्थीहरूको शब्दभण्डार, सही हिज्जे लेख्ने क्षमता र बौद्धिक दक्षता निखार्ने उद्देश्यले आयोजित प्रतियोगितामा अन्नपूर्ण सदनले उत्कृष्ट प्रदर्शन गर्दै प्रथम स्थान हात पारेको हो।
स्कुलका अतिरिक्त क्रियाकलाप संयोजक नयनराज राईका अनुसार कञ्चनजङ्घा सदन द्वितीय, मनास्लु सदन तृतीय तथा सगरमाथा सदनले सान्त्वना स्थान हासिल गरेका छन्।
प्रतियोगितामा उत्कृष्ट प्रदर्शन गर्ने विद्यार्थीहरूलाई स्कुलका भाइस प्रिन्सिपल विजय सिंह थेबे र शिक्षिका सपना शाहले मेडल तथा प्रमाणपत्र प्रदान गर्दै बधाई दिएका थिए।
स्कुलका प्रबन्ध निर्देशक गङ्गाराम राईले यस्ता प्रतियोगिताले विद्यार्थीमा शब्दभण्डार विस्तार गर्नुका साथै सही हिज्जे लेख्ने बानी, आत्मविश्वास र प्रस्तुतीकरण क्षमता अभिवृद्धि हुने बताए।
विद्यालयले शैक्षिक उपलब्धिसँगै अतिरिक्त क्रियाकलापलाई पनि समान प्राथमिकता दिँदै विद्यार्थीको सिर्जनशीलता, नेतृत्व क्षमता र सिकाइलाई व्यवहारिक बनाउने अभियानलाई निरन्तरता दिँदै आएको जनाएको छ।
