-साङ्केतिक तस्बिर
खोटाङ/ खोटाङको साकेला गाउँपालिका–४ पारुङमा मदिरा सेवनपछि दाजुभाइबीच भएको झगडाले दुःखद रूप लिँदा एक जनाको मृत्यु भएको छ।
घटनामा संलग्न दुई जनालाई प्रहरीले नियन्त्रणमा लिएर अनुसन्धान अघि बढाएको छ।
जिल्ला प्रहरी कार्यालय खोटाङका अनुसार आइतबार साँझ करिब ८ बजे ४८ वर्षीय इमानसिंह राई र उनका ३५ वर्षीय भाइ ओइमानसिंह राईबीच घरायसी विवाद चर्किएर कुटाकुट भएको थियो। दुवैले मदिरा सेवन गरेका थिए।
झगडाका क्रममा ओइमानसिंह घरको बरन्डाबाट लड्दा टाउको र पेटमा गम्भीर चोट लागेको प्रहरीले जनाएको छ। घाइते उनलाई तत्काल जिल्ला अस्पताल खोटाङ लगिएको थियो। उपचारकै क्रममा सोमबार बिहान २:२५ बजे चिकित्सकले उनलाई मृत घोषणा गरेका थिए।
घटनामा संलग्न रहेको आरोपमा इमानसिंह राई र सोही स्थानका ३० वर्षीय जीवन राईलाई प्रहरीले नियन्त्रणमा लिएको छ। दुवैलाई जिल्ला प्रहरी कार्यालय खोटाङमा राखी घटनाको थप अनुसन्धान भइरहेको प्रहरीले जनाएको छ।
