धरान/ सुनसरीमा प्रहरीले एकैदिन सञ्चालन गरेको छुट्टाछुट्टै कारबाहीमा ब्राउन सुगरसहित सात जनालाई पक्राउ गरेको छ।
पक्राउ पर्नेमा तीन किशोरसमेत रहेका छन्। उनीहरूको साथबाट करिब पाँच ग्राम ब्राउन सुगर बरामद भएको प्रहरीले जनाएको छ।
शनिबार बिहान करिब ११ बजे इलाका प्रहरी कार्यालय लौकहीबाट खटिएको टोलीले कोशी गाउँपालिका–१ लौकही बजारमा भारतबाट नेपालतर्फ आउँदै गरेको बीआर ३८ भी ०७८४ नम्बरको मोटरसाइकललाई शङ्काका आधारमा रोकी जाँच गर्दा सिटमुनि लुकाएर राखिएको १.८२ ग्राम ब्राउन सुगर बरामद गरेको थियो।
उक्त घटनामा मोटरसाइकल चालक कोशी गाउँपालिका–६ का ४० वर्षीय सुरेन्द्र महतो पक्राउ परेका छन्।
त्यसैगरी साँझ करिब ५ः३० बजे लागूऔषध कारोबार भइरहेको भन्ने सूचनाका आधारमा इलाका प्रहरी कार्यालय इटहरी र प्रहरी बिट गैसारबाट खटिएको संयुक्त टोलीले इटहरी–१ आदर्श टोलमा ३६ वर्षीय हरीप्रसाद पराजुलीलाई पक्राउ गरेको छ। उनको साथबाट ०.५१ ग्राम ब्राउन सुगर बरामद भएको प्रहरीले जनाएको छ।
यस्तै, साँझ ७ः३० बजे अस्थायी प्रहरी पोस्ट बसपार्क इनरुवाबाट खटिएको टोलीले इनरुवा–४ ट्याक्सी स्ट्यान्ड क्षेत्रमा पैदल हिँडिरहेका तीन जनालाई जाँच गर्दा २.६५ ग्राम ब्राउन सुगर फेला पारेको थियो।
पक्राउ पर्नेमा इटहरी–१७ का १६ वर्षीय सुशान्त चौधरी, १८ वर्षीय अरमान खान र १८ वर्षीय सक्सेस दास रहेका छन्।
प्रहरीले तीनवटै घटनामा बरामद लागूऔषध, मोटरसाइकल तथा पक्राउ परेकाहरूमाथि थप अनुसन्धान भइरहेको जनाएको छ।
