_1693980289.gif "#")
धरान/ सुनसरी–१ बाट निर्वाचित प्रतिनिधिसभा सदस्य तथा धरानका पूर्वमेयर हर्क साम्पाङको सवारी चालक अनुमति पत्र (लाइसेन्स) लामो समयदेखि नवीकरण नभएको तथ्य सार्वजनिक भएको छ।
यातायात व्यवस्था कार्यालय इटहरीको अभिलेख अनुसार साम्पाङले २०७१ पुस ६ मा अन्तिम पटक जरिवानासहित आफ्नो ‘ए’ श्रेणीको लाइसेन्स नवीकरण गरेका थिए। त्यसयता भने उनले लाइसेन्स नवीकरण नगरेको भेटिएको छ।
प्रहरी स्रोतका अनुसार साम्पाङको लाइसेन्स २०७३ पुस १२ मा म्याद सकिएको थियो। सवारी तथा यातायात व्यवस्था ऐन, २०४९ को दफा ५७ अनुसार तोकिएको अवधिभित्र नवीकरण नगरिए चालक अनुमति पत्र स्वतः रद्द हुने व्यवस्था छ। सोही आधारमा उनको लाइसेन्सको वैधता समाप्त भइसकेको प्रारम्भिक निष्कर्ष निकालिएको छ।
प्रहरी प्रधान कार्यालय अन्तर्गतको राजमार्ग सुरक्षा तथा ट्राफिक व्यवस्थापन महाशाखाले यस विषयमा थप छानबिन तथा कानुनी परामर्श गरिरहेको जनाएको छ।
एक अधिकृतका अनुसार म्याद सकिएको पाँच वर्षभित्र जरिवाना तिरेर लाइसेन्स नवीकरण गर्न सकिने भए पनि साम्पाङले करिब एक दशकदेखि नवीकरण प्रक्रिया पूरा नगरेको देखिएको छ।
यसैबीच, गत जेठ २९ गते उदयपुरगढी गाउँपालिका–६ स्थित मदन भण्डारी लोकमार्गमा मोटरसाइकल चलाउँदा ट्राफिक नियम उल्लंघन गरेको आरोपमा साम्पाङलाई ट्राफिक प्रहरीले कारबाही गरेको थियो।
सामाजिक सञ्जालमा सार्वजनिक भिडियोमा उनले एक हातले मोटरसाइकल चलाउँदै अर्को हातले भिडियो खिचिरहेको देखिएपछि व्यापक आलोचना भएको थियो। त्यसपछि ट्राफिक प्रहरीले उनको नाममा चिट जारी गरी जरिवाना गरेको थियो।
सन् २००६ मा इटहरीबाट लाइसेन्स लिएका साम्पाङले २०१४ पछि नियमित नवीकरण नगरेको अभिलेखमा देखिएको छ।
कानुन अनुसार वैध लाइसेन्स बिना सवारी साधन चलाउनु गैरकानुनी मानिन्छ। यस घटनाले सार्वजनिक पदमा रहेका व्यक्तिहरूले समेत ट्राफिक नियम र कानुनी प्रक्रियाको पालना गर्नुपर्ने विषयलाई पुनः चर्चामा ल्याएको छ।
