झापा/ भारतबाट अवैधरूपमा लागुऔषध भित्र्याउने प्रयास गर्दै गरेका एक युवकलाई झापाको काँकरभिट्टाबाट प्रहरीले ठूलो परिमाणको खैरो हिरोइनसहित पक्राउ गरेको छ।
लागुऔषध नियन्त्रण ब्युरो कार्यालय काँकरभिट्टा र इलाका प्रहरी कार्यालय काँकरभिट्टाको संयुक्त टोलीले आइतबार दिउँसो मेचीनगर नगरपालिका–६ स्थित मेचिडाँडामा शंकास्पद अवस्थामा नेपालतर्फ पैदल आउँदै गरेका काठमाडौँको शंखरापुर नगरपालिका–८ निवासी ३२ वर्षीय रोशन कार्कीलाई नियन्त्रणमा लिएको हो।
प्रहरीका अनुसार भारतबाट मेची खोलाको बाटो हुँदै नेपाल प्रवेश गरिरहेका कार्कीमाथि शंका लागेपछि शरीर तथा सामान जाँच गरिएको थियो। जाँचका क्रममा उनले लगाएको बक्स पाइन्टको दाहिने गोजीमा लुकाएर राखिएको सेतो प्लाष्टिकको पोका फेला परेको थियो।
उक्त पोका खोलेर हेर्दा खैरो हिरोइन भेटिएको र डिजिटल तराजुमा तौल गर्दा प्लाष्टिकसहित ५३ ग्राम ८०० मिलिग्राम तथा प्लाष्टिक बाहेक ४८ ग्राम ६० मिलिग्राम खैरो हिरोइन बरामद भएको प्रहरीले जनाएको छ।
प्रहरीले कार्कीको साथबाट प्रयोगमा रहेको आईफोन १६ प्रो म्याक्स, त्यसमा प्रयोग भएको मोबाइल नम्बर तथा रु ८ हजार नगद समेत बरामद गरेको छ।
पक्राउ परेका कार्कीलाई थप अनुसन्धानका लागि इलाका प्रहरी कार्यालय काँकरभिट्टामा राखिएको छ। घटनाबारे विस्तृत अनुसन्धान जारी रहेको प्रहरीले जनाएको छ।
