इटहरी/ मोडर्न प्रिपेरेटोरी सेकेण्डरी स्कुल ले युगकवि सिद्धिचरण श्रेष्ठ को जन्मजयन्तीको अवसरमा विशेष सिर्जना वाचन कार्यक्रम आयोजना गर्दै विद्यार्थीहरूमा नेपाली साहित्यप्रति रुचि जगाउने प्रयास गरेको छ।
वि.सं. २०४९ सालदेखि इटहरीमा स्थापित तथा हाल नर्सरीदेखि कक्षा १० सम्म अध्यापन हुँदै आएको इटहरी–६ स्थित विद्यालयमा पछिल्लो समय विद्यार्थीको आकर्षण उल्लेखनीय रूपमा बढ्दै गएको छ।
कार्यक्रममा कक्षा ६ देखि १० सम्मका विद्यार्थीहरूले करिब ३० वटा कविता वाचन गर्दै आफ्नो सिर्जनात्मक क्षमता प्रस्तुत गरेका थिए।
प्रधानाध्यापक पद्मराज सापकोटा को अध्यक्षतामा सम्पन्न कार्यक्रम कक्षा ९ का विद्यार्थी प्रशिका निरौला र युना लवर ले आकर्षक ढंगले सञ्चालन गरेका थिए।
नेपाली शिक्षिका अनिता पौडेल ले कार्यक्रमको औचित्यमाथि प्रकाश पार्नुभएको थियो भने सामाजिक विषय शिक्षिका इन्दिरा पौडेल ले कविता वाचनमार्फत कार्यक्रमलाई थप प्रेरणादायी बनाएकी थिइन्।
अतिथिका रूपमा सहभागी साहित्यकार तथा शिक्षक जयप्रकाश काफ्ले ले समिक्षात्मक टिप्पणी प्रस्तुत गरेका थिए।
कार्यक्रमको समापन गर्दै प्रधानाध्यापक सापकोटाले अल्फा जेनेरेसनका विद्यार्थीहरूमा नेपाली कविता र साहित्यप्रति रुचि अभिवृद्धि गर्ने उद्देश्यले कार्यक्रम आयोजना गरिएको बताउँदै यसलाई सफल बनाउन सहयोग गर्ने सम्पूर्ण विद्यार्थी, शिक्षक–शिक्षिका तथा उपस्थित सबैप्रति धन्यवाद व्यक्त गर्नुभयो।
