धरान/ चिकित्सकलाई भगवानको रूप किन भनिन्छ भन्ने उदाहरण फेरि एकपटक धरानमा देखिएको छ।
बीपी कोइराला स्वास्थ्य विज्ञान प्रतिष्ठान मा गरिएको दुर्लभ र जटिल शल्यक्रियाले एक बिरामीलाई नयाँ जीवन दिएको छ।
वरिष्ठ सर्जन डा. रिकेशजंग कार्की को नेतृत्वमा रहेको चिकित्सक टोलीले इटहरी–५ का मनोज श्रेष्ठको पेटभित्र रहेको १८ किलोग्रामको विशाल ट्युमर सफलतापूर्वक निकाल्न सफल भएको हो।
अत्यन्त जोखिमपूर्ण मानिएको उक्त शल्यक्रिया लामो समयसम्म सञ्चालन गरिएको थियो।
चिकित्सकहरूका अनुसार ट्युमरले पेटभित्रका महत्वपूर्ण अंगहरूमा गम्भीर दबाब सिर्जना गरेको थियो, जसका कारण शल्यक्रिया निकै चुनौतीपूर्ण बनेको थियो।
तर अनुभवी टोलीको समन्वय, दक्षता र आधुनिक प्रविधिको प्रयोगले असम्भवजस्तै देखिएको कार्य सम्भव बनायो।
शल्यक्रियामा संलग्न डा. रिकेशजंग कार्की ले ट्युमरको आकार अत्यन्त ठूलो भएकाले सानो त्रुटिले पनि जटिल अवस्था निम्त्याउन सक्ने बताउँदै अत्यन्त सावधानीपूर्वक शल्यक्रिया सम्पन्न गरिएको जानकारी दिनुभयो। उहाँका अनुसार सम्पूर्ण टिमको समर्पण र उच्च सतर्कताका कारण यस्तो सफलता सम्भव भएको हो।
शल्यक्रियापछि बिरामी मनोज श्रेष्ठको स्वास्थ्य अवस्था सामान्य बन्दै गएको छ। लामो समयदेखि पेट अस्वाभाविक रूपमा ठूलो हुँदै जाँदा हिँडडुल गर्न समेत कठिनाइ भोगिरहेका श्रेष्ठले अन्ततः बीपीका चिकित्सकबाट नयाँ जीवन पाएकोमा आभार व्यक्त गरेका छन्।
यो सफलतासँगै बीपी कोइराला स्वास्थ्य विज्ञान प्रतिष्ठान ले जटिल तथा दुर्लभ शल्यक्रियामा आफ्नो उच्च क्षमता पुनः प्रमाणित गरेको छ।
चिकित्सकहरूका अनुसार यस्ता केसहरू विरलै हुने भए पनि समयमै उपचार नगरे ज्यानै जोखिममा पर्न सक्ने भएकाले नेपालमै उच्चस्तरीय उपचार सम्भव रहेको सन्देश समेत दिएको छ।
