_1693980289.gif "#")
-फाइल तस्बिर
धरान/धरान–४ देवीथानस्थित कोशी लोकमार्गमा बस दुर्घटनामा एक वृद्धको ज्यान गएको छ।
धरानबाट धनकुटातर्फ जाँदै गरेको को१ख ६०९० नम्बरको बसबाट झर्ने क्रममा धरान–४ निवासी ७८ वर्षीय प्रेमबहादुर मगर बसको ठक्करबाट गम्भीर घाइते भएका थिए।
बस रोकेर ओर्लिएपछि बाहिरिने क्रममा अचानक बस अगाडि बढ्दा पछाडिको बायाँ भागमा ठोक्किएर उनी बेहोस बनेका थिए।
घाइते मगरलाई तत्कालै बीपी कोइराला स्वास्थ्य विज्ञान प्रतिष्ठान, धरान लगिएको थियो। तर उपचारकै क्रममा सोमबार साँझ करिब साढे ४ बजे चिकित्सकले मृत घोषणा गरेका थिए।
प्रहरीका अनुसार बाहिरी चोटपटक खासै नदेखिए पनि आन्तरिक चोटका कारण मृत्यु भएको हुनसक्ने अनुमान गरिएको छ।
बस चालक भोजपुर हतुवागढी गाउँपालिका–१ का ३७ वर्षीय गोविन्द बस्नेतलाई प्रहरीले नियन्त्रणमा लिएको छ। इलाका प्रहरी कार्यालय धरानका डीएसपी भीषणबाबु राईका अनुसार चालकको लापरवाहीका कारण दुर्घटना भएको प्रारम्भिक निष्कर्ष निकालिएको छ।
घटनापछि मृतकको शव अस्पतालमै राखिएको छ भने घटनाबारे थप अनुसन्धान भइरहेको प्रहरीले जनाएको छ।
