_1693980289.gif "#")
धरान/ सुनसरीको धरान उपमहानगरपालिका–१३ आँपगाछीस्थित कोशी लोकमार्गमा प्रहरीले ठूलो परिमाणमा लागूऔषध गाँजा बरामद गरेको छ।
इलाका प्रहरी कार्यालय धरानबाट खटिएको टोलीले ५९ केजी प्रतिबन्धित गाँजासहित तीन जना भारतीय नागरिकलाई नियन्त्रणमा लिएको हो।
मिति २०८३ वैशाख ५ गते बिहान करिब ११:१० बजे भेडेटारबाट धरानतर्फ आउँदै गरेको BR 10 PB 2241 नम्बरको भारतीय स्कार्पियो गाडीलाई शंका लागेर जाँच गर्दा सिटमुनी ‘फल्स बटम’ बनाएर लुकाइछिपाइ ल्याइएको गाँजा फेला परेको प्रहरीले जनाएको छ।
प्रहरी निरीक्षक अमरदिप भण्डारीको कमाण्डमा खटिएको टोली तथा अस्थायी प्रहरी चौकी अमरहाटबाट प्रहरी सहायक निरीक्षक मनोज कुमार बलको नेतृत्वमा खटिएको संयुक्त टोलीले चेकजाँच गरेको थियौ ।
पक्राउ पर्नेहरूमा भारत, बिहार राज्य सुपौल जिल्लाका २२ वर्षीय चालक सुबिध कुमार, २२ वर्षीय रोहित कुमार र ४० वर्षीय मोहम्मद जमशेर रहेका छन्। उनीहरूलाई गाडी सहित नियन्त्रणमा लिएर थप अनुसन्धान भइरहेको प्रहरीले जनाएको छ।
उक्त स्थान इप्रका धरानबाट करिब ७ किलोमिटर उत्तरतर्फ पर्छ। प्रहरीका अनुसार पछिल्लो समय कोशी लोकमार्ग प्रयोग गरी लागूऔषध ओसारपसार गर्ने प्रयास बढ्दो देखिएको छ।
