धरान/ धरान–१२ स्थित पब्लिक हाई स्कुलले ७९औँ अभिभावक दिवस, दीक्षान्त तथा नतिजा प्रकाशन कार्यक्रम भव्य र उत्साहपूर्ण रूपमा सम्पन्न गरेको छ।
विद्यालय परिसरमा आयोजित कार्यक्रममा युकेजी तह पूरा गरेका ५४ जना साना विद्यार्थीलाई औपचारिक रूपमा दीक्षित गरिएको छ भने प्ले ग्रुपदेखि कक्षा–९ सम्मका विद्यार्थीहरूको वार्षिक नतिजा पनि सार्वजनिक गरिएको विद्यालयले जनाएको छ।
प्रधानाध्यापक डा. इन्द्रमोहन झाले दीक्षित विद्यार्थीलाई प्रमाणपत्र, अबिर, खादा, गाउन र ह्याटसहित सम्मानपूर्वक दीक्षान्त प्रदान गरेका थिए।
कार्यक्रमका प्रमुख अतिथि तथा धरान उपमहानगरपालिकाका कार्यवाहक मेयर अइन्द्र विक्रम बेघाले विद्यालयले गुणस्तरीय शिक्षा प्रदान गर्दै विद्यार्थीहरूको प्रतिभा विकासमा महत्वपूर्ण भूमिका खेलेको बताए। उनले पब्लिक हाई स्कुल प्रदेशकै नमुना विद्यालयका रूपमा स्थापित हुँदै गएको उल्लेख गरे।
कार्यक्रमलाई थप आकर्षक बनाउन विद्यार्थीहरूले नृत्य र गीत प्रस्तुत गरेका थिए भने विज्ञान प्रदर्शनीसँगै विभिन्न खाद्य स्टलहरूले सहभागीलाई विशेष आकर्षण दिएका थिए।
