काठमाडौं/ मुलुकको राजनीतिक वृत्तलाई तरंगित बनाउने घटनाक्रममा पूर्व प्रधानमन्त्री केपी शर्मा ओली र पूर्व गृहमन्त्री रमेश लेखक पक्राउ परेका छन्।
उनीहरूलाई शनिबार बिहान भक्तपुरबाट नियन्त्रणमा लिएर काठमाडौंको भद्रकालीस्थित जिल्ला प्रहरी परिसरमा राखिएको छ।
प्रहरी स्रोतका अनुसार ओलीलाई गुण्डुबाट र लेखकलाई कटुन्जेबाट पक्राउ गरिएको हो। हाल दुवैजनालाई जिल्ला प्रहरी परिसर काठमाडौंमा राखेर आवश्यक अनुसन्धान प्रक्रिया अघि बढाइएको छ।
भदौ २३ र २४ मा भएको ‘जेनजी’ प्रदर्शनको घटनालाई लिएर गठित गौरीबहादुर कार्की नेतृत्वको आयोगले पूर्व प्रधानमन्त्री ओली, रमेश लेखकसहित केन्द्रीय सुरक्षा समितिका पदाधिकारीमाथि फौजदारी मुद्दा चलाउन सिफारिस गरेको थियो।
उक्त सिफारिसलाई कार्यान्वयन गर्ने निर्णय शुक्रबार बालेन्द्र शाह (बालेन) नेतृत्वको मन्त्रिपरिषद्ले गरेपछि घटनाले नयाँ मोड लिएको हो। त्यसलगत्तै गृहमन्त्री सुधन गुरुङ ले नेपाल प्रहरीका आईजीपी दानबहादुर कार्की तथा सशस्त्र प्रहरीका आईजी राजु अर्याल सँग रातभर छलफल गरेका थिए।
सोही छलफलपछि शनिबार बिहानै दुवै पूर्व उच्चपदस्थ व्यक्तिलाई पक्राउ गरिएको हो।
