इटहरी/ मोडर्न प्रिपरेटरी सेकेन्डरी बोर्डिङ स्कुल इटहरी ले विद्यार्थी र अभिभावकहरूको स्वास्थ्यलाई प्राथमिकतामा राख्दै आयोजना गरेको निःशुल्क स्वास्थ्य शिविर भव्य रूपमा सम्पन्न भएको छ।
विद्यालयले विराट मेडिकल कलेज तथा शिक्षण अस्पताल सँगको सहकार्यमा सञ्चालन गरेको उक्त एकदिने शिविरमा विद्यार्थी तथा अभिभावकहरूको उत्साहजनक सहभागिता देखिएको थियो।
शिविरमा ३०० भन्दा बढी विद्यार्थी र करिब १०० अभिभावकसहित झण्डै 400 जनाको स्वास्थ्य परीक्षण गरिएको विद्यालयले जनाएको छ। सहभागीहरूलाई सामान्य स्वास्थ्य जाँच, आँखाको परीक्षण, रक्तचाप (ब्लड प्रेसर) मापन, सुगर परीक्षण तथा आवश्यक स्वास्थ्य परामर्श प्रदान गरिएको थियो।
शिविर सञ्चालनका लागि अस्पतालका अनुभवी चिकित्सकहरूको टोली खटिएको थियो। टोलीको नेतृत्व डा. किशोर अवस्थी ले गर्नुभएको थियो भने अन्य स्वास्थ्यकर्मीहरू पनि सक्रिय रूपमा सहभागी भएका थिए।
विद्यालयद्वारा जारी सूचनामा विद्यार्थी तथा अभिभावकहरूको स्वास्थ्य अवस्थालाई ध्यानमा राख्दै यस्ता निःशुल्क शिविर आयोजना गरिएको उल्लेख गरिएको छ।
कार्यक्रमले विद्यालयले शैक्षिक उत्कृष्टतासँगै विद्यार्थीहरूको समग्र विकास र स्वास्थ्यलाई पनि समान प्राथमिकता दिएको स्पष्ट पारेको छ।
शिविरमा सहभागी अभिभावकहरूले यस्ता उपयोगी कार्यक्रमप्रति खुशी व्यक्त गर्दै निरन्तरता दिन आग्रह गरेका छन्।
विगत ३४ वर्षदेखि इटहरी क्षेत्रमा गुणस्तरीय शिक्षा प्रदान गर्दै आएको उक्त विद्यालयले यस्ता सामाजिक उत्तरदायित्वका कार्यक्रममार्फत शिक्षा र स्वास्थ्यबीचको सम्बन्धलाई अझ सुदृढ बनाउँदै आएको छ।
साथै, यस्ता कार्यक्रमहरूले समुदायमा स्वास्थ्य सचेतना अभिवृद्धि गर्ने विश्वास विद्यालयले व्यक्त गरेको छ।
