धरान/ लागूऔषध कारोबार भइरहेको गोप्य सूचनाको आधारमा वडा प्रहरी कार्यालय धरानले चार जनालाई ३६० क्याप्सुल प्रतिबन्धित औषधसहित नियन्त्रणमा लिएको छ।
मिति २०८२ फागुन ४ गते दिउँसो १२ः३० बजे धरान उप–महानगरपालिका वडा नं.–९ वगैचा लाइन क्षेत्रमा लागूऔषधको कारोबार भइरहेको भन्ने सूचनापछि प्रहरी टोली खटिएको थियो। सो क्रममा प्रहरीले Spasmo Proxyvon-Plus नामक ३६० क्याप्सुलसहित चार जनालाई पक्राउ गरेको जनाएको छ।
पक्राउ पर्नेमा जिल्ला सुनसरी कोशी गाउँपालिका–५ बस्ने १८ वर्षीय जसिम अकतर, सोही स्थानका १८ वर्षीय सरफराज आलम, धरान–१९ बस्ने २८ वर्षीय विकाश बुढाथोकी तथा ४१ वर्षीय हेमन्त लामा रहेका छन्।
उनीहरूलाई इलाका प्रहरी कार्यालय धरानमा राखी थप अनुसन्धान अघि बढाइएको प्रहरीले जनाएको छ।
पछिल्लो समय धरान क्षेत्रमा लागूऔषध कारोबार र सेवनका घटनामा वृद्धि भइरहेका बेला प्रहरीले निगरानी कडा बनाएको छ। प्रहरीले लागूऔषध नियन्त्रण अभियानलाई अझ प्रभावकारी बनाइने पनि जनाएको छ।
