_1693980289.gif "#")
धरान/ युकेमा रहनु भएका विजय लिम्बूले वर्तमान चुनावी माहोल खतरनाक दिशातर्फ उन्मुख भइरहेको भन्दै गम्भीर चिन्ता व्यक्त गरेका छन् ।
उनले राखजनीतिले विचार, नीति र कार्यक्रमभन्दा टाढा गएर अनुहार र लोकप्रियताको खेल बन्दै जानु देशका लागि दुर्भाग्यपूर्ण भएको बताएका छन् ।
लिम्बूले सामाजिक सञ्जालमार्फत सार्वजनिक गरेको सन्देशमा देश चलाउन आकर्षक अनुहार वा राम्रो बोल्ने कला पर्याप्त नहुने उल्लेख गर्दै आर्थिक नीति, स्पष्ट योजना, निर्णय क्षमता र इमानदार नेतृत्व नै राष्ट्र सञ्चालनका आधार भएको धारणा राखेका छन् । “राम्ररी बोल्न सक्नु योग्यता होइन, क्यामेरा फ्रेन्ड्ली हुनु क्षमता होइन,” भन्दै उनले वर्तमान चुनावी प्रवृत्तिप्रति प्रश्न उठाएका छन् ।
उनका अनुसार अहिलेको चुनावी बहस व्यक्तिकेन्द्रित बन्दै गएको छ, जसले दीर्घकालीन रूपमा लोकतन्त्र र शासन प्रणालीलाई कमजोर बनाउने खतरा बोकेको छ । उनले मतदातालाई लोकप्रिय अनुहार होइन, स्पष्ट दृष्टिकोण र कार्यक्षमताको मूल्याङ्कन गरेर निर्णय लिन आग्रह गरेका छन् ।
“हामीले नेता होइन, नीति रोज्नुपर्छ । अनुहार होइन, दृष्टिकोण रोज्नुपर्छ । लोकप्रियता होइन, क्षमता रोज्नुपर्छ,” लिम्बूले सन्देशमा उल्लेख गरेका छन् । उनले भोट हाल्दा सेलिब्रिटी होइन, देशको सरकार छानिँदैछ भन्ने कुरा सधैं स्मरण गर्नुपर्नेमा जोड दिएका छन् ।
विजय लिम्बूको यो सन्देशले चुनावी समयमा बढ्दो सतही बहस र व्यक्तिपूजाको प्रवृत्तिप्रति गम्भीर बहसको खाँचो औंल्याएको विश्लेषकहरू बताउँछन् ।
