_1693980289.gif "#")
बिर्तामोड/ झापाको प्रतिष्ठित फुटबल प्रतियोगिता ‘एक्स्ट्रिम सातौँ झापा गोल्डकप विनोद बस्नेत स्मृति संस्करण अन्तर्राष्ट्रिय आमन्त्रण नकआउट फुटबल प्रतियोगिता’ यही माघ २४ गतेदेखि सुरु हुने भएको छ ।
बिर्तामोडस्थित डोमालाल राजवंशी रंगशालामा माघ २४ देखि फागुन ४ गतेसम्म सञ्चालन हुने प्रतियोगिताबारे शुक्रबार आयोजित पत्रकार सम्मेलनमा झापा गोल्डकपका अध्यक्ष केदार गिरीले जानकारी गराए ।
प्रतियोगिताको मुख्य प्रायोजकका रूपमा एग्रो थाई फुड्स प्रालिको उत्पादन ‘एक्स्ट्रिम इनर्जी ड्रिंक्स’ रहनेछ । प्रतियोगिताका विजेताले १५ लाख र उपविजेताले ७ लाख ५० हजार रुपैयाँ नगद पुरस्कार प्राप्त गर्नेछन् ।
त्यस्तै, प्रतियोगिताको मस्ट भ्यालुएबल प्लेयर ले मोटरसाइकल पाउनेछ भने सर्वाधिक गोलकर्ता, उत्कृष्ट गोलकिपर र उत्कृष्ट प्रशिक्षकलाई जनही ३५ हजार रुपैयाँ पुरस्कार प्रदान गरिनेछ । प्रत्येक खेलको ‘प्लेयर अफ द म्याच’ लाई २१ हजार रुपैयाँ नगद दिइने आयोजकले जनाएको छ ।
विधागत पुरस्कारको प्रायोजन अमेरिका निवासी रोशनलाल श्रेष्ठ सहितको टोलीले गरेको हो ।
प्रतियोगितामा विभागीय टोली त्रिभुवन आर्मी क्लब, नेपाल पुलिस क्लब, एपीएफ क्लब, साथै महिन्द्र क्लब, लालीगुराँस क्लब पोखरा सहित घरेलु तथा विदेशी गरी १० टोली सहभागी हुनेछन् । अन्तर्राष्ट्रिय सहभागितामा भुटानको रोयल थिम्पु कलेज, भारतको सिग्लिज स्पोर्टिङ क्लब र मलेसियाको एन पेनाङ एफसी रहनेछन् ।
यस वर्ष झापाका एक जना पुराना फुटबल खेलाडीलाई २५ हजार रुपैयाँ नगदसहित सम्मान गरिनेछ भने रंगशालाको जग्गादाता डोमालाल राजवंशीको परिवारलाई पनि २५ हजार रुपैयाँ सहयोग प्रदान गरिने आयोजकले जनाएको छ ।
प्रतियोगिता सञ्चालनका लागि करिब १ करोड ५० लाख रुपैयाँ खर्च अनुमान गरिएको छ । त्यसबाट करिब ३० प्रतिशत बचत गर्ने लक्ष्य रहेको अध्यक्ष गिरीले बताए ।
प्रतियोगिताको टिकट दर क्वाटरफाइनलका लागि १००, सेमिफाइनलका लागि २०० र फाइनलका लागि ३०० रुपैयाँ तोकिएको छ । करिब एक लाख दर्शक भित्र्याउने लक्ष्य आयोजकको छ । क्लबका २०३ जनाले सदस्यता नविकरण र १९० जनाले नयाँ सदस्यता लिएका छन् ।
कार्यक्रममा झापा गोल्डकपका वरिष्ठ उपाध्यक्ष गजेन्द्रबहादुर पौडेलले स्वागत मन्तव्य राखेका थिए भने कार्यक्रमको सञ्चालन सञ्चारकर्मी केशव भट्टराईले गरेका थिए ।
