_1693980289.gif "#")
धरान/ सुनसरीको धरान उपमहानगरपालिका–१७ स्थित एडिभी खानेपानी ट्याङ्की छेउबाट लागूऔषधसहित दुई जना युवक पक्राउ परेका छन्।
इलाका प्रहरी कार्यालय धरानबाट खटिएको प्रहरी टोलीले कालाबञ्जारबाट धरानतर्फ आउँदै गरेको को १८ प ४२५६ नम्बरको मोटरसाइकल जाँच गर्दा ठूलो परिमाणमा लागूऔषध फेला पारेको हो।
मिति २०८२ साल ०९ महिना २७ गते बिहान करिब ६ः३० बजे गरिएको चेकजाँचका क्रममा मोटरसाइकलमा बोरा भित्र लुकाएर ल्याइँदै गरेको ट्रामाडोल ९ हजार ९ सय १० क्याप्सुल बरामद गरिएको प्रहरीले जनाएको छ।
प्रहरीले मोटरसाइकल चालक सुनसरीको कोशी गाउँपालिका–१ निवासी २३ वर्षीय रोशन झा र पछाडि सवार सोही स्थानका १८ वर्षीय जयप्रकाश यादवलाई नियन्त्रणमा लिएको छ।
बरामद लागूऔषध, मोटरसाइकल तथा दुवै अभियुक्तलाई इलाका प्रहरी कार्यालय धरानमा राखी थप अनुसन्धान भइरहेको प्रहरीले जनाएको छ।
लागूऔषध ओसारपसार र प्रयोगले समाजमा बढ्दो समस्या सिर्जना गरिरहेको बेला धरान प्रहरीले गरेको यो कारबाहीलाई महत्वपूर्ण उपलब्धिका रूपमा लिइएको छ।
