_1693980289.gif "#")
धरान/ बीपी कोइराला स्वास्थ्य विज्ञान प्रतिष्ठान धरानमा आगामी माघ महिनामा अखिल नेपाल मेडिकल कलेज भेटघाट कार्यक्रम ‘सिन्याप्स–२०२६’ आयोजना हुने भएको छ ।
विद्यार्थी कल्याण समाज, बीपी प्रतिष्ठानको आयोजनामा सञ्चालन हुने उक्त कार्यक्रम माघ १६ गतेदेखि २३ गतेसम्म सातौँव्यापी रूपमा चल्ने आयोजकले जानकारी दिएका छन् ।
आयोजनाबारे जानकारी दिन मंगलबार आयोजित पत्रकार सम्मेलनमा आयोजक समितिका अध्यक्ष प्रज्वल विक्रम खाणले सिन्याप्स–२०२६ अन्तर्गत खेलकुद, सांस्कृतिक, साहित्यिक तथा विविध सिर्जनात्मक र बौद्धिक गतिविधिहरू सञ्चालन गरिने बताए ।
मेडिकल तथा स्वास्थ्य विज्ञान अध्ययनरत विद्यार्थीहरूबीच आपसी सम्बन्ध सुदृढ गर्नु, स्वस्थ प्रतिस्पर्धाको प्रवर्द्धन गर्नु र प्रतिभा उजागर गर्ने उद्देश्यले कार्यक्रम आयोजना गर्न लागिएको उनको भनाइ छ ।
महोत्सवको पहिलो दिन उद्घाटन समारोहसँगै विभिन्न खेलकुद प्रतियोगिताका लिग चरण सुरु हुनेछन् । प्रत्येक दिन साँझ थिम आधारित सांस्कृतिक कार्यक्रम आयोजना गरिने आयोजकले जनाएको छ ।
सिन्याप्स–२०२६ मा फुटबल, क्रिकेट, बास्केटबल, भलिबल, ब्याडमिन्टन, टेबल टेनिस, लन टेनिस, एथलेटिक्स, चेस, क्यारम, ई–स्पोर्ट्स, जिम स्पोर्ट्स तथा पौडी प्रतियोगिता सञ्चालन गरिनेछ ।
त्यसैगरी क्विज, चित्रकला, कविता वाचन, खुला मञ्च कविता, स्ट्यान्डअप कमेडी, मोनोलग, कथा लेखन, हिज्जे प्रतियोगिता तथा फोटोग्राफी प्रतियोगिता पनि समावेश गरिने जनाइएको छ ।
कार्यक्रम अवधिभर सामूहिक रक्तदान, दैनिक सांस्कृतिक प्रस्तुति, डान्स पार्टी र अन्तिम दिन भव्य सांगीतिक कन्सर्ट आयोजना गरिनेछ ।
आयोजक समितिले सिन्याप्स–२०२६ ले देशभरका मेडिकल विद्यार्थीहरूबीच समन्वय, सहकार्य र मित्रता अभिवृद्धि गर्ने विश्वास व्यक्त गरेको छ ।
