_1693980289.gif "#")
धरान/ सुनसरीको धरान उपमहानगरपालिकामा लागूऔषध कारोबारविरुद्ध प्रहरीले गरेको कारबाहीमा एकै दिन दुई जना पक्राउ परेका छन्।
मिति २०८२ साल पुस १८ गते बिहान करिब १०:३० बजेको समयमा धरान–१८ स्थित घोपा क्याम्प परिसरभित्र अस्थायी प्रहरी चौकी श्यामचोकबाट खटिएको प्रहरी टोलीले शंकास्पद रूपमा हिँडिरहेको प्र०१–०२–०४१ प ५३०४ नम्बरको मोटरसाइकललाई रोकी जाँच गरेको थियो।
जाँचका क्रममा मोटरसाइकल चालक धरान–१० निवासी २१ वर्षीय युवराज कार्कीको साथबाट लागूऔषध ट्रामाडोल ४५० क्याप्सुल र स्पास्मो ४५० ट्याब्लेट फेला परेको प्रहरीले जनाएको छ। लागूऔषधसहित मोटरसाइकलसमेत बरामद गरिएको छ।
यसैगरी, सोही दिन राति करिब ९:३० बजेको समयमा धरान–१३ स्थित सुर्यमार्गमा लागूऔषध कारोबार भइरहेको भन्ने सूचनाका आधारमा इलाका प्रहरी कार्यालय धरानबाट खटिएको प्रहरी टोलीले धरानमै बसोबास गर्ने ४५ वर्षीय सानु सुनुवारलाई नियन्त्रणमा लिएको छ। खानतलासीका क्रममा सुनुवारको साथबाट लागूऔषध डाइजोपाम १८ एम्पुल फेला परेको प्रहरीले जानकारी दिएको छ।
पक्राउ परेका दुवै जनालाई लागूऔषधसहित इलाका प्रहरी कार्यालय धरानमा ल्याई थप अनुसन्धान भइरहेको प्रहरीले जनाएको छ।
प्रहरीले धरान क्षेत्रमा लागूऔषध ओसारपसार तथा कारोबार नियन्त्रणका लागि निगरानी र कारबाहीलाई निरन्तरता दिने बताएको छ।
