-सांगेतिक तस्बिर
झापा/ झापाको भद्रपुर नगरपालिका–१ मा विद्यालय जाने क्रममा एक नाबालिगमाथि यौन दुर्व्यवहार भएको घटनामा संलग्न एक जनालाई प्रहरीले पक्राउ गरेको छ।
प्रहरीका अनुसार मिति २०८२ साल पुस १३ गते बिहान करिब १० बजे विद्यालयतर्फ जाँदै गरेकी १४ वर्षीया नाबालिगलाई बाटोमै रोकी जिस्क्याउने तथा अश्लील हर्कत गरी हैरानी दिएको उजुरी प्राप्त भएपछि अनुसन्धान सुरु गरिएको थियो।
उक्त घटनामा संलग्न भएको आरोपमा भद्रपुर नगरपालिका–१ निवासी करिब ४० वर्षीय मंगल टुडुलाई मिति २०८२ साल पुस १४ गते इलाका प्रहरी कार्यालय पृथ्वीनगरबाट खटिएको प्रहरी टोलीले नियन्त्रणमा लिई जिल्ला प्रहरी कार्यालय झापा पठाएको हो।
प्रहरी अनुसन्धानका क्रममा अभियुक्तले यसअघि पनि सार्वजनिक स्थान तथा विद्यालय जाने बाटोमा विद्यार्थीहरूलाई लक्षित गरी अश्लील हर्कत गर्दै हैरानी दिने गरेको खुलेको छ।
घटनासम्बन्धी अनुसन्धान तथा कानुनी कारबाहीका लागि मुलुकी अपराध संहिता २०७४ अन्तर्गत करणी कसुर(बाल यौन दुर्व्यवहार) अभियोगमा जिल्ला अदालत झापाबाट मिति २०८२ साल पुस १६ गते पहिलो पटकका लागि पाँच दिनको म्याद थप गरिएको जिल्ला प्रहरीले जनाएको छ।
प्रहरीले यस्ता घटनाबारे जानकारी पाए तत्काल नजिकको प्रहरी कार्यालयमा उजुरी गर्न सर्वसाधारणलाई आग्रह गरेको छ।
