_1693980289.gif "#")
-फणिन्द्र तिम्सिना
धरान/ जेनजी युवाशक्ति, सहिद परिवार, घाइते तथा सचेत नागरिकहरूको पहलमा स्थापना भएको राष्ट्रिय परिवर्तन पार्टीले सुनसरी जिल्लाको घोषणा सभा यही पौष १९ गते धरानको भानुचौकमा आयोजना गर्ने भएको छ।
जिल्लाभरिका पार्टी नेता–कार्यकर्ता र शुभेच्छुकको बृहत् उपस्थितिमा हुने सभामा पार्टीको आगामी राजनीतिक दिशा, संगठन विस्तार तथा नीति–कार्यक्रमबारे स्पष्ट धारणा सार्वजनिक गरिने पार्टीले जनाएको छ।
पार्टीका सुनसरी जिल्ला अध्यक्ष युमेन हाङ राईका अनुसार अन्य जिल्लामा घोषणा सभा सम्पन्न भइसकेको र सुनसरीको कार्यक्रम विशेष महत्वका साथ आयोजना गर्न लागिएको हो।
घोषणा सभा पार्टीका केन्द्रीय अध्यक्ष राजेश पोर्तेलको प्रमुख आतिथ्यतामा हुनेछ।
जेनजी आन्दोलनका क्रममा घाइते भई एक खुट्टा गुमाएका पोर्तेल पार्टीका संस्थापक अभियन्ता हुन्।
पार्टी सचिव शिवराज जिमीका अनुसार कार्यक्रममा पूर्व आइजिपी सर्वेन्द्र खनाल, पूर्व प्रधान सेनापति माधव सुन्दर खड्का तथा पार्टीका केन्द्रीय प्रवक्ता विशेष अतिथिका रूपमा सहभागी हुनेछन्।
जिल्ला अध्यक्ष हाङ राईले निर्वाचनका लागि उम्मेदवारी छनोट र सिफारिस अन्य जिल्लामा सकिएको र सुनसरीमा तयारी अन्तिम चरणमा रहेको बताए। उनले पार्टीको अस्तित्व कमजोर पार्ने गरी कुनै पनि दलसँग पार्टी एकता नहुने स्पष्ट पारे।
