धरान/सुनसरीको धरान उप–महानगरपालिकामा लागू औषध कारोबारविरुद्ध प्रहरीले चलाएको विशेष निगरानी अभियानमा दुई फरक स्थानबाट ठूलो परिमाणमा नशालु औषध बरामद गरिएको छ।
मिति २०८२।०९।०३ गते दिउँसो १३:४० बजे, धरान–१३ विशाल मार्ग क्षेत्रमा लागू औषध कारोबार भइरहेको सूचनाका आधारमा अस्थायी प्रहरी पोष्ट जोरसखुवाबाट खटिएको टोलीले २८ वर्षीय सञ्जय तामाङको कोठामा खानतलासी गरेको थियो।
सो क्रममा कोठाभित्र लुकाइछिपाइ राखिएको अवस्थामा ट्रामाडोल १६७ ट्याब्लेट र स्पास्पेन ५७२ क्याप्सुल बरामद गरिएको प्रहरीले जनाएको छ।
यसैगरी, मिति २०८२।०९।०२ गते राति २२:०० बजे, धरान–५ देउराली क्षेत्रमा लागू औषध ओसारपसार भइरहेको भन्ने सूचनाका आधारमा अस्थायी प्रहरी चौकी श्यामचोकबाट खटिएको टोलीले १९ वर्षीय समिर राईको कोठामा चेकजाँच तथा खानतलासी गरेको थियो। उक्त खानतलासीका क्रममा डिकोलिक ३०७७ ट्याब्लेट र स्पास्पेन ५१७० ट्याब्लेट गरी जम्मा ८२४७ ट्याब्लेट लागू औषध फेला परेको छ।
दुवै घटनामा पक्राउ परेका व्यक्तिहरूलाई बरामद लागू औषधसहित थप अनुसन्धान भइरहेको प्रहरीले जानकारी दिएको छ। प्रहरीले धरान क्षेत्रमा लागू औषध कारोबार नियन्त्रणका लागि निगरानी र कारबाहीलाई थप तीव्र बनाइने जनाएको छ।
