वराहक्षेत्र/ वराहक्षेत्र नगरपालिका र भोक्राह नर्सिङ गाउँपालिकाका सामुदायिक विद्यालयका व्यवस्थापन समितिका पदाधिकारी, शिक्षक तथा विद्यार्थीलाई लक्षित गर्दै दुईदिने विपद् जोखिम न्युनिकरण तालिम सुरु गरिएको छ।
वराहक्षेत्र नगरपालिकासँगको समन्वयमा विश्व खाद्य कार्यक्रम को आर्थिक सहयोग तथा राष्ट्रिय वातावरण तथा सम विकास (निड्स) नेपाल को प्राविधिक सहयोगमा तालिम आयोजना गरिएको हो। आइतबारदेखि सुरु भएको तालिम पूर्वानुमानमा आधारित अग्रिम कार्य परियोजना अन्तर्गत विद्यालय केन्द्रित रूपमा सञ्चालन गरिएको छ।
तालिममा विपद् व्यवस्थापन, पूर्वानुमान र पूर्वतयारी विषयलाई पाठ्यक्रमको प्राथमिकतामा राखिएको छ। सहजीकरण निड्स नेपालका परियोजना संयोजक इ. दिपेन्द्र बहादुर सिंह, डा. देव मानन्धर तथा पाठ्यक्रम विकास केन्द्रका निर्देशक दिनानाथ गौतमले गर्नेछन्।
नगरपालिकाको सभाहलमा सम्पन्न उद्घाटन समारोहमा नगर प्रमुख रमेश कार्की, उप–प्रमुख नन्दकुमारी सुनुवार, प्रमुख प्रशासकीय अधिकृत गणेशबहादुर कटुवाल, विश्व खाद्य कार्यक्रमका कोशी प्रदेश संयोजक लक्ष्मी नारायण चौधरी, निड्स नेपालका परियोजना संयोजक दिपेन्द्र बहादुर सिंह, पाठ्यक्रम विकास केन्द्रका निर्देशक दिनानाथ गौतमलगायतको उपस्थिति रहेको थियो। साथै, दुवै स्थानीय तहका सामुदायिक विद्यालयका पदाधिकारी, शिक्षक, विद्यार्थी तथा नगरपालिकाका कर्मचारीहरूको उल्लेखनीय सहभागिता रहेको थियो।
