धरान/ धरान खेलकुद महोत्सव–२०८२ अन्तर्गत आज शुक्रबार साँझ नेपालका चर्चित गायिका एलिना चौहान र लोकप्रिय गायक प्रताप दास धरान रंगशालामा दर्शकलाई रोमाञ्चक सांगीतिक साँझ दिने भएका छन्। उनीहरूले आफ्ना सबैभन्दा भाइरल र लोकप्रिय गीतहरू प्रस्तुति दिनेछन्।
एलिना चौहानका “धोकेबाज हौ तिमी” र “एक्लैपनि जिन्दगी” गीतहरू युवामाझ निकै लोकप्रिय छन् भने प्रताप दासका “मोटर साइकलमा” र “फूल होइन” जस्ता गीतहरू पनि दर्शक माझ मन पराइएका छन्। यसैगरी दुवैले सँगै गाएका “आयो तिहार – दाजु बहिनी” गीतले पनि राम्रो चर्चा पाएको छ।
धरान खेलकुद मञ्चले मङ्सिर २५ देखि पुस १० सम्म विभिन्न खेलकुद प्रतियोगिता र सांगीतिक कार्यक्रमसहित महोत्सव आयोजना गरेको छ। उद्घाटन समारोहमा नेपाली फुटबलका पूर्व कप्तान राजु शाक्यले दीप प्रज्वलन गर्दै महोत्सवको सुरु गरेका थिए। महोत्सवमा फुटबल, हक्की, बास्केटबल, डोरी तान, सुटिङ र गल्फजस्ता खेलकुद गतिविधिहरू चलिरहेका छन्।
धरान खेलकुद मञ्चका अध्यक्ष किशोर राईले महोत्सवलाई धरानको गौरवको रूपमा सफल बनाइदिन सबैको साथ आवश्यक रहेको बताए भने उप–मेयर अइन्द्र बिक्रम बेघाले खेलकुदले समाजलाई एकताबद्ध गर्ने माध्यम भएको उल्लेख गर्दै शुभकामना व्यक्त गरे।
आजको साँझको सांगीतिक कार्यक्रमले महोत्सवको माहोल अझ रोमाञ्चक र मनोरञ्जनमय बनाउने आयोजक र दर्शकको अपेक्षा रहेको छ।
