_1693980289.gif "#")
धरान / सुनसरीको धरान उप–महानगरपालिका–८ तिनकुने क्षेत्रमा प्रहरीले ठूलो मात्रामा लागू औषध बरामद गरेको छ।
विशेष सूचनाका आधारमा खटिएको अस्थायी प्रहरी पोष्ट तिनकुनेको टोलीले लागू औषध ओसारपसारमा संलग्न ३ जनालाई पक्राउ गरेको हो।
मंसिर २२ गते साँझ करिब ४:४० बजे लांघाली सामुदायिक वनतर्फबाट तिनकुनेतर्फ आउँदै गरेको को १ ह ७७२८ नम्बरको अटोलाई चेकजाँच गर्दा चालक लाक्पा देर्जे तामाङ (२८, धरान–१५) र सोही अटोमा सवार प्रमिला राई (२३, धरान–४) को साथबाट ट्रामोल र स्पास पेन औषधिको सानो मात्रा फेला परेको थियो।
प्रहरीका अनुसार तामाङको साथबाट Tramol-50 का १० क्याप्सुल, Spas Pain का १० ट्याब्लेट, र राईको साथबाट Tramol-50 का १०० क्याप्सुल र Spas Pain का १०० ट्याब्लेट बरामद गरिएको हो।
उनीहरू लागू औषध आपूर्ति गर्ने समूहको सदस्य रहेको प्रारम्भिक अनुसन्धानमा खुलेपछि प्रहरीले सोही औषधि आपूर्ति गर्ने मुख्य शंकित टेकबहादुर तामाङ (६६, धरान–८) को घरमा समेत खानतलासी गरेको थियो।
खानतलासीका क्रममा टेकबहादुरको कोठाबाट ठूलो परिमाणमा लागू औषध फेला परेको प्रहरीले जनाएको छ—
यससँगै पक्राउ परेकाबाट अघिल्लो बरामद समेत जोड्दा प्रहरीले कुल Tramol-50 का १,१३४ क्याप्सुल र Spas Pain का १,१२० ट्याब्लेट नियन्त्रणमा लिएको छ।
प्रहरीले अटो सहित तीनैजनालाई नियन्त्रणमा लिएर इलाका प्रहरी कार्यालय धरानमा बुझाइ अधिक अनुसन्धान सुरु गरिएको जानकारी दिएको छ।
