_1693980289.gif "#")
धरान /दोस्रो धरान वडा–स्तरीय महिला नकआउट रनिङ कप फुटबल प्रतियोगिता बिहीबार धरान–१६ स्थित रंगशालामा आकर्षक प्रतिस्पर्धासहित सुरु भएको छ। उद्घाटन खेलमै गत वर्षको च्याम्पियन वडा नं. १७ ले वडा नं. १६ लाई १–० गोलले पराजित गर्दै विजयी सुरुवात गरेको छ।
खेलको पहिलो हाफको १४औँ मिनेटमा वडा १७ की जर्सी नं. १२ सुनिता राईको तीव्र प्रहारले १६ नं. वडाको जाली चुमेपछि खेलमा रोमाञ्च बढेको थियो। बराबरीमा फर्किन वडा १६ ले प्रयास गरे पनि सफल हुन सकेन। सुनिताको सोही गोल नै खेलको निर्णायक गोल बन्न पुग्यो।
उता, सशक्त प्रदर्शनका आधारमा वडा १६ की प्रमिला जिमी ‘प्लेयर अफ द म्याच’ घोषित भइन्। उनले २ हजार रुपैयाँ पुरस्कार प्राप्त गरिन्।
प्रतियोगिताको उद्घाटन प्रमुख अतिथि सुनसरी प्रमुख जिल्ला अधिकारी बासुदेव घिमिरेले बेलुन उडाएर तथा अम्पायरलाई बल हस्तान्तरण गरी गरे। उनले प्रतियोगितालाई महिला सशक्तिकरणको प्रभावकारी अभ्यासको रूपमा व्याख्या गर्दै महिलाहरू दर्शक मात्र नभई उत्कृष्ट खेलाडी हुन सक्ने सन्देश यसले दिएको बताए।
“महिलाले खेलकुदका हरेक कार्यक्रममा भाग लिन सक्छन्, प्रदर्शन गर्न सक्छन् र गोल हान्न सक्छन्—यही तथ्यलाई यस प्रतियोगिताले पुष्टि गर्छ,” उनले भने।
उद्घाटन समारोह जनपथ जागरण समाजका अध्यक्ष सुजन केसीको सभापतित्वमा सम्पन्न भएको थियो। कार्यक्रममा एन्फाका वरिष्ठ मानार्थ उपाध्यक्ष तथा कोशी प्रदेश फुटबल संघका अध्यक्ष किशोर राई, वडा १६ का अध्यक्ष मुरारी प्रसाद भट्टराई, सियोन स्कुलका डाइरेक्टर खड्ग बहादुर राणा मगरलगायतले शुभकामना मन्तव्य व्यक्त गरेका थिए।
त्यसैगरी पूर्व मेयर तिलक राई, एन्फा सुनसरीका नविन राई, विभिन्न वडाध्यक्ष तथा धरान फुटबल क्लबका अध्यक्ष प्रताप तामाङलगायत अतिथिको उपस्थिति उल्लेखनीय थियो।
आगामी खेलहरू अन्तर्गत भोलि वडा नं. ३ र वडा नं. १४ तथा वडा नं. ५ र वडा नं. २० बीच प्रतिस्पर्धा हुने आयोजकले जनाएको छ।
धरानलाई महिला फुटबल प्रतिभा उत्पादनको केन्द्र बनाउने लक्ष्यसहित आयोजना गरिएको प्रतियोगितामा विजेताले ९० हजार, उपविजेताले ४५ हजार, प्लेयर अफ द म्याचले २ हजार, बेस्ट किपर र बेस्ट मिडफिल्डरले ३,५००, र बेस्ट प्लेयरले ५ हजार रुपैयाँ प्राप्त गर्नेछन्।
