_1693980289.gif "#")
सुनसरी/ वराहक्षेत्र नगरपालिका–६, चक्रघट्टीस्थित महेन्द्रनगर स्वास्थ्य चौकी अब नवनिर्मित आधुनिक भवनबाट विस्तारिएको सेवासहित सञ्चालनमा आएको छ।
साकेला पार्कअगाडिको साझा भवन परिसरमा बनेको नयाँ संरचनाको रिबन काट्दै नगर प्रमुख रमेश कार्कीले स्वास्थ्य सेवाको औपचारिक शुभारम्भ गरेका हुन्।
नेपाल सरकारको खानेपानी तथा ढल व्यवस्थापन विभागअन्तर्गत मझौला र साना शहरहरुमा खानेपानी, सरसफाइ तथा स्वास्थ्य पहलमार्फत कोभिड–१९ रोकथाम तथा नियन्त्रण कार्यक्रमले निर्माण गरेको सामुदायिक बहुउद्देश्यीय भवन ७६० वर्गमिटर क्षेत्रफलमा फैलिएको आधुनिक संरचना हो।
१६ बेड क्षमताका दुई कोठासहित प्रशासनिक कक्ष, नर्सिङ कक्ष, स्टोर, १६ अक्सिजन सिलिन्डर र महिला–पुरुष तथा अपांगमैत्री शौचालयसमेत भवनमा व्यवस्था गरिएको छ।
उद्घाटन कार्यक्रममा प्रमुख प्रशासकीय अधिकृत गणेशबहादुर कटुवाल, वडा–६ का अध्यक्ष तथा चौकी अध्यक्ष उद्वब प्रसाद पोखरेल, शाखा प्रमुखहरू, स्वास्थ्यकर्मी तथा स्थानीय सरोकारवालाहरूको उपस्थिति थियो।
२०७९ चैत १० गते शिलान्यास गरिएको यो भवन स्वामित्वमा लिएपछि स्वास्थ्य सेवा अझ सहज, व्यवस्थित र प्रभावकारी बन्ने अपेक्षा नगरपालिकाले व्यक्त गरेको छ।
