प्रतिकात्मक तस्वीर
धरान/ सुनसरीको धरान–८ तीनकुनेमा रोकेर राखिएको ट्रकमा मोटरसाइकल ठोक्किँदा शुक्रवार बिहानका राति एक जनाले ज्यान गुमाएका छन् भने एकजना गम्भीर घाइते भएका छन्।
प्रहरीका अनुसार कोशी राजमार्गअन्तर्गत तीनकुनेस्थित सडकको छेउमा पार्क गरिएको प्रदेश १–०२–००१ ख ८७५७ नम्बरको ट्रकमा राति १ः३० बजेतिर धरानबाट इटहरीतर्फ जाँदै गरेको प्रदेश १–०३–००१ प १३२४ नम्बरको मोटरसाइकल जोरदार रूपमा ठोक्किएको थियो।
दुर्घटनामा मोटरसाइकल चालक इटहरी–४ का २५ वर्षीय मञ्जिल लिम्बू र पछाडि सवार इटहरी–५ का ३२ वर्षीय अमित राई गम्भीर घाइते बनेका थिए। उपचारका लागि बीपी कोइराला स्वास्थ्य विज्ञान प्रतिष्ठान पुर्याइएकोमा चालक लिम्बूलाई चिकित्सकले मृत घोषित गरेको प्रहरीले जनाएको छ। राईको अवस्था गम्भीर रहेकाले उपचार जारी छ।
दुर्घटना पश्चात् मोटरसाइकल, ट्रक र ट्रक चालक तेह्रथुम फेदाप–२ का २७ वर्षीय गणेश भण्डारीलाई नियन्त्रणमा लिएर थप अनुसन्धान भइरहेको प्रहरीको भनाइ छ। प्रारम्भिक अनुसन्धानमा मोटरसाइकलको तीव्र गतिका कारण दुर्घटना भएको खुलेको प्रहरीले जनाएको छ।
