धरान/ सुनसरीको धरान उप–महानगरपालिका–१७ र २० को सिमाना, चुम्पुले खोलाको जंगल क्षेत्रबाट प्रहरीले ठूलो मात्रामा लागू औषध गाँजा बरामद गरेको छ।
विशेष सूचनाका आधारमा राति २३:२५ बजे कोशी प्रदेश प्रहरी कार्यालय, विराटनगरको PIT टोली त्यहाँ पुगेको थियो।
टोलीलाई देखेपछि करिब १०–११ जना भरीयाहरू भारी बोकेकै अवस्थामा भाग्दै जंगलतर्फ फरार भएका थिए।
उनीहरूले बोकिरहेका बोरा फालेर भागेपछि प्रहरीले खोलेर जाँच गर्दा १० वटा बोराभित्र प्याक गरिएको २६८ किलो (दुई सय अर्सठी किलो) गाँजा फेला परेको प्रहरीले जनाएको छ।
बरामद गरिएको सबै लागू औषध अहिले इलाका प्रहरी कार्यालय धरानमा ल्याई थप अनुसन्धान अघि बढाइएको छ।
फरार व्यक्तिहरूको पहिचान तथा पक्राउका लागि प्रहरीले व्यापक खोजतलास जारी राखेको छ।
