_1693980289.gif "#")
काठमाडौँ/तीन महत्वपूर्ण विकास मन्त्रालय सम्हालिरहेका कुलमान घिसिङ आज सोमबार नयाँ राजनीतिक दल ‘जनसेवा पार्टी’ को औपचारिक घोषणा गर्न तयार छन्।
उनी निकट स्रोतका अनुसार यसअघि दर्ता भइसकेको ‘उज्यालो नेपाल पार्टी’ को नाम परिवर्तन गरी निर्वाचन आयोगमा नयाँ दल दर्ता प्रक्रिया अघि बढ़ाइनेछ।
पार्टीको शीर्ष नेतृत्वमा को रहने भन्नेबारे अन्तिम निर्णय आज बिहान टुङ्गो लाग्नेछ।
कुलमान स्वयं अध्यक्ष बन्ने कि पूर्व ऊर्जासचिव डा. अनुपकुमार उपाध्यायलाई नेतृत्व जिम्मा दिने भन्ने विषयमा छलफल तीव्र रहेको बताइएको छ।
नयाँ पार्टीले ‘एक व्यक्ति, एक पद’ नीति कठोर रूपमा लागू गर्ने तयारी गरेको छ।
सो अनुसार सरकारमा जिम्मेवारी पाउने व्यक्तिहरू पार्टीको कुनै पदमा रहने छैनन्। यही नीतिका कारण कुलमानलाई भावी प्रधानमन्त्रीका रूपमा अघि सार्ने लक्ष्यसहित अध्यक्षमा डा. उपाध्यायलाई अगाडि ल्याउने विकल्पसमेत खुलेर चर्चा भएको छ।
कुलमान निकट समूहको महत्वपूर्ण बैठक हिजो बौद्धमा बसेको थियो, जहाँ पार्टीको नीति, संरचना र कार्ययोजना तयार गरिएको स्रोतले जानकारी दियो।
यसबीच, काठमाडौँ महानगरपालिकाका मेयर बालेन्द्र साह (बालेन) ले पार्टीलाई समर्थन जनाउने भए पनि उनी पदमै रहने र औपचारिक रूपमा दलमा प्रवेश नगर्ने, तर उनका प्रतिनिधिहरू सक्रिय रहने बताइएको छ।
विकास, पारदर्शिता र सेवा केन्द्रित दृष्टिकोणसहित अघि बढ्ने लक्ष्य लिएको ‘जनसेवा पार्टी’ ले आजकै घोषणाले राजनीतिक वृत्तमा नयाँ तरंग ल्याएको छ।
