काठमाडौं/ नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ले आज पार्टीको केन्द्रीय कार्यालयको अवलोकन गरेका छन्।
जेनजी आन्दोलनका क्रममा आगजनी र तोडफोडपछि क्षतिग्रस्त बनेको कार्यालयको अवस्थाबारे उनले प्रत्यक्ष जानकारी लिएका हुन्।
आन्दोलन उग्र बनेपछि प्रचण्ड २४ गतेदेखि सेनाको कडा सुरक्षा घेरामा थिए। सुरक्षा कारण पार्टी गतिविधिबाट केही समय टाढा रहेका उनले नयाँ अन्तरिम सरकार गठनसँगै फेरि सक्रिय राजनीतिक भूमिकामा फर्किएका छन्।
कार्यालय अवलोकनका क्रममा प्रचण्डले आन्दोलनका नाममा हिंसा र तोडफोड हुनु दुःखद रहेको उल्लेख गर्दै पार्टी संरचना पुनः सुदृढ बनाउन तत्काल पहल गर्ने प्रतिबद्धता जनाएका छन्। साथै, उनले क्षतिग्रस्त कार्यालयको मर्मत तथा पार्टी कामलाई अझ प्रभावकारी बनाउन आवश्यक कदम चालिने बताएका छन्।
