धरान/धरान उपमहानगरपालिकाको कार्यपालिका बैठकले आर्थिक वर्ष २०८२/८३ को बजेटमा १० प्रतिशत कटौती गर्ने निर्णय गरेको छ।
शुक्रबार बसेको बैठकमा मेयर हर्कराज राई (साम्पाङ)ले पेश गरेको प्रस्तावमा एमालेकी सावित्री परियारले पुँजीगततर्फ १०% घटाउने संशोधन राखेकी थिइन्। सो प्रस्तावलाई कार्यपालिकाले सर्वसम्मत अनुमोदन गरेको हो।
अब २ अर्ब २० करोड ७४ लाख ५९ हजारको बजेटमा कटौती गरी नयाँ सिलिङ कायम हुने भएको छ।
प्रवक्ता मनोज भट्टराईका अनुसार कटौतीपश्चात् रातो किताबमा सूचीकृत सबै योजना कार्यान्वयन हुनेछन्।
यसैबीच, ‘मेयर भिजन’ र ‘उपमेयर भिजन’ नामक योजनाको नाम परिवर्तन गरी ‘नगर भिजन’ राख्ने निर्णय गरिएको छ। तर उपमेयर अइन्द्रविक्रम बेघाले नाम परिवर्तनमा असहमति जनाएका छन्।
कार्यपालिका बैठकले नीति तथा कार्यक्रम एमालेका सुझावसहित संशोधन गरी भदौ २२ गते पारित गर्ने निर्णय गरेको छ। नगरसभा भने भदौ २६ गते दिउँसो १ बजे उपमहानगर परिसरमै हुने भएको छ।
पालिका गानका विषयमा भने विवाद भएको छ। छनोट भएको कवयित्री टिका आत्रेयको सृजनामा रहेको ‘श्रमिक’ शब्दलाई मेयर साम्पाङले ‘श्रमदाता’ बनाएर गीत रेकर्ड गराएपछि उपमेयर बेघा र वडाअध्यक्षहरुले आपत्ति जनाएका छन्।
अन्ततः मेयर साम्पाङले स्रष्टासँग छलफल गर्ने भन्दै एजेण्डा स्थगित गरेका छन्।
