एसईई आइडलको पाँचौँ संस्करण : खिना, रोहन र मिसुले जिते उपाधि

धरान/फक्ताङ्लुङ मिडिया हाउस प्रालिको आयोजनामा शुक्रबार सम्पन्न ‘एसईई आइडल’को पाँचौँ संस्करणमा तीन विधामा उत्कृष्ट प्रतिभाहरूले उपाधि चुमेका छन् ।

धरानमा आयोजना गरिएको प्रतियोगितामा सिङ्गिङ (गायन) मा खिना राना मगर, डान्सिङ (नृत्य) मा रोहन दर्नाल र वक्तृत्वकलामा मिसु प्रधान विजेता घोषित भएका हुन् ।

विजेताहरूले नगद पुरस्कारसँगै कक्षा ११ र १२ सम्मको निःशुल्क छात्रवृत्ति, सिक्किम वा मुस्ताङ भ्रमण र बारिस्टा तालिम जस्ता अवसर प्राप्त गरेका छन् ।

गायन र नृत्यतर्फका विजेताहरूले जनही ५० हजार रुपैयाँ नगद र वक्तृत्वतर्फका विजेताले ६० हजार रुपैयाँ नगद प्राप्त गरे ।

२०७५ सालदेखि सुरु भएको सो प्रतियोगिता वर्षेनी नयाँ विधा थपिंदै आइरहेको छ ।

यसपटक एफटीएल अनलाइन टिभीको प्रस्तुति रहेको कार्यक्रममा सिङ्गिङतर्फ रिजु लिम्बू फस्ट रनर अप, अल्बिन श्रेष्ठ सेकेन्ड रनर अप र निम्तेङ्गी तामाङ थर्ड रनर अप घोषित भए । उनीहरूले क्रमशः ३०, २० र १० हजार रुपैयाँसहित विभिन्न उपहार प्राप्त गरे ।

डान्सिङतर्फ खड्गराज पाण्डे फस्ट रनर अप, करन थापा सेकेन्ड रनर अप र सिकुम लिम्बू थर्ड रनर अप घोषित भए । वक्तृत्वतर्फ युना दाहाल (फस्ट रनर अप), सलिना राई (सेकेन्ड रनर अप) र सन्ध्या राई (थर्ड रनर अप) ले उपाधि हात पारे ।

रनर अप घोषित भएका सबै प्रतिभाहरूले नगद पुरस्कारसहित ७० प्रतिशतसम्मको छात्रवृत्तिमा कक्षा ११ र १२ सम्म अध्ययन गर्ने अवसर प्राप्त गरेका छन् ।

फाइनल प्रतिस्पर्धामा छनोट भएका अन्तिम १० जना सहभागीहरूलाई ५० प्रतिशत छात्रवृत्ति उपलब्ध गराइने आयोजक संस्थाका अध्यक्ष डम्बरकुमार तुम्बापोले जानकारी दिए ।

त्यस्तै, ‘पब्लिक चोइस अवार्ड’मा डान्सतर्फ सिकुम लिम्बू, सिङ्गिङमा रिजु लिम्बू र वक्तृत्वतर्फ सिखा न्यौपानेले अवार्ड जितेका छन् । उनीहरूले जनही ७ हजार रुपैयाँ नगदसहित उपहारहरू प्राप्त गरे ।

कोशी प्रदेश सरकारका आर्थिक मामिला तथा योजनामन्त्री रामबहादुर मगरले उद्घाटन गरेको सो प्रतियोगितामा चर्चित गायिका मेलिना राई र गायक विकास तुम्बापोले सांगीतिक प्रस्तुति दिएका थिए ।

विजेताहरूलाई गायिका राई, गायक तुम्बापो, प्रालिका अध्यक्ष डम्बरकुमार तुम्बापो, इभेन्ट म्यानेजर रामबहादुर लिम्बू र युएन कलेजका गगनमान श्रेष्ठ लगायतले पुरस्कार वितरण गरेका थिए ।