झापा/ झापाको बुद्धशान्ति गाउँपालिका–४ स्थित बर्नेबाट इलामतर्फ जाने सडक खण्ड अहिले गुलमोहरका ढकमक्क फुलहरूले रङ्गीन बनेको छ। हरियाली चिया बगानको बीचमा राताम्य भएर फुलेका गुलमोहरहरूले यो सडक खण्डलाई झन् आकर्षक बनाएका छन्।
पर्यटक र यात्रुका लागि फोटोग्राफी तथा भिडिओ बनाउने उपयुक्त पृष्ठभूमिका रूपमा परिचित यो क्षेत्र सामाजिक सञ्जालमा 'ट्रेन्डिङ' बन्न थालेको छ। ‘टिकटक रोड’ नाम दिइएको आधा किलोमिटर सडक खण्डमा दैनिक हजारौँको चहलपहल देखिन्छ।
बुद्धशान्ति गाउँपालिकाका अध्यक्ष मनोज प्रसाईँका अनुसार चहलपहलको औपचारिक तथ्यांक नभए पनि दैनिक रूपमा यहाँ आउनेको सङ्ख्या वृद्धि भइरहेको छ। पालिकाले पिउने पानी, शौचालय, चौतारोजस्ता पूर्वाधार निर्माण गरिसकेको छ भने स्थानीयहरूले चिया पसल र साना होटल सञ्चालन गर्न थालेका छन्।
इलामको कन्याम, श्रीअन्तु र माइपोखरीतर्फ गएका वा बुद्धशान्ति–६ मा रहेको कोशी प्रदेशकै लामो झोलुङ्गे पुल अवलोकन गर्न गएका पर्यटकका लागि यो गुलमोहर सडक थप आकर्षण बनेको छ।
पर्यटन प्रवर्द्धनलाई प्राथमिकता दिँदै गाउँपालिकाले गत वर्ष दुई सयभन्दा बढी गुलमोहरका बिरुवा रोपेको थियो। विशेष गरी शनिबार र बिदाका दिन यहाँ भिड लाग्ने गरेको छ। यात्रुको चाप बढेसँगै सार्वजनिक सवारी साधनमा समेत चाप बढेको स्थानीय बताउँछन्।
