विराटनगर/ विराटनगरस्थित एक किराना पसलमा सामान किन्न गएकी भारतीय युवती ५ सय दरका ७ थान नक्कली नोटसहित पक्राउ परेकी छन्।
पक्राउ परेकी युवती भारत बिहारको अररिया जिल्ला घर भएकी १९ वर्षीया सिम्पी बैसन्ती हुन्।
कोशी प्रदेश प्रहरी प्रवक्ता एसएसपी भीमबहादुर दाहालका अनुसार बैसन्ती विराटनगर महानगरपालिका–१३ मा रहेको किराना पसलमा बुधबार सामान किन्न गएकी थिइन्।
पसलमा उनले भारतीय ५ सय रुपैयाँको नोट दिएकी थिइन्, जुन नक्कली भएको आशंका लागेपछि पसल सञ्चालकले प्रहरीलाई खबर गरेका थिए।
सूचना पाएलगत्तै इलाका प्रहरी कार्यालय रानीबाट खटिएको प्रहरी टोलीले बैसन्तीलाई नियन्त्रणमा लिएको थियो।
खानतलासी गर्दा उनका साथबाट ५ सय दरका ७ थान नक्कली भारतीय नोट फेला परेको दाहालले जानकारी दिए। साथै, उनको साथबाट ३ हजार १ सय रुपैयाँ नेपाली नगद पनि फेला परेको छ।
पक्राउ परेकी युवतीमाथि थप अनुसन्धान भइरहेको प्रहरीले जनाएको छ।
