धरान/ २५ औं गोधुली रनिङ कप फुटबल प्रतियोगिता अन्तर्गत शुक्रबार सम्पन्न खेलमा १० नं. वडाले टाइब्रेकरमा १२ नं. वडालाई पराजित गर्दै प्रिक्वाटर फाइनलमा स्थान सुरक्षित गरेको छ।
निर्धारित समयभित्र कुनै पनि गोल हुन नसकेपछि खेलको निर्णय टाइब्रेकरबाट गरिएको थियो। टाइब्रेकरमा १० नं. वडाले ४–२ गोल अन्तरले विजयी भएको हो।
१० नं. वडाका निमेश लिम्बू, सिसल लिम्बू, शुभम भूजेल र आशिष राई ले गोल गरे भने १२ नं. वडाबाट सञ्जीव राई र सुमन राई मात्र गोल गर्न सफल भए।
१२ नं. वडाका सरोज लिम्बूको प्रहार बाहिरियो भने आयुष राईको प्रहार १० नं. वडाका गोलकिपरले रोकिदिए।
खेलमा उत्कृष्ट प्रदर्शन गरेका १० नं. वडाका गोलकिपर कस्तुप पिठाकोटे मगर 'म्यान अफ द म्याच' घोषित भए।
शनिबारको खेल ८ नं. वडा र १५ नं. वडा बीच साँझ ६ बजे सुरु हुने आयोजकले जनाएको छ। दुवै टोलीलाई उपाधि दाबेदार मानिएकोले खेल प्रतिष्पर्धात्मक हुने अपेक्षा गरिएको छ।
धरानका १८ वटा वडाको सहभागिता रहेको प्रतियोगिता चैत्र २१ गतेसम्म चल्नेछ।
२ नं. वडा र ७ नं. वडाले सहभागिता जनाएनन्। प्रतियोगिताको विजेताले १ लाख ५० हजार नगद पुरस्कार प्राप्त गर्नेछन् भने उपविजेताले ७५ हजार नगद पुरस्कार जित्नेछन्।
स्व. सुवास राई स्मृति सुपर ८ प्रतियोगितामा क्वाटर फाइनल पुगेका टोलीहरू सहभागी हुने अवसर पाउनेछन्।
प्रतियोगिता सफल बनाउन गोधुली क्लबका उपाध्यक्ष सतिस केसी को विशेष भूमिका रहेको आयोजकले जनाएको छ।
