वराहक्षेत्र/ वराहक्षेत्र नगरपालिकामा जारी तेस्रो संस्करणको वडा स्तरीय वराहक्षेत्र मेयर लिग कप रनिङ्ग शिल्ड फुटबल प्रतियोगिताको पहिलो सेमिफाइनल खेलमा वडा नं ५ विजयी भएको छ।
आइतवार सम्पन्न खेलमा वडा नं ५ ले वडा नं ९ लाई १-० गोल अन्तरले पराजित गर्दै फाइनलको यात्रा तय गरेको हो।
अब उपाधिका लागि वडा नं ५ ले वडा नं २ सँग प्रतिस्पर्धा गर्नेछ। वडा नं २ ले सेमिफाइनलमा वडा नं १० लाई हराउँदै फाइनल यात्रा तय गरिसकेको छ। प्रतियोगिताको फाइनल खेल बुधवार हुनेछ।
सेमिफाइनल खेलमा उत्कृष्ट प्रदर्शन गरेका वडा नं ५ का दिपेन कार्की म्यान अफ द म्याच घोषित भए। उनले नगद २ हजार १ सय रुपैयाँ सहित ट्रफी प्राप्त गरे।
तेस्रो स्थानको लागि मंगलबार प्रतिस्पर्धा
लिग फर्म्याटमा सुरु भएको प्रतियोगिता अन्तर्गत मंगलबार तेस्रो स्थानका लागि वडा नं ९ र वडा नं १० बीच प्रतिस्पर्धा हुनेछ।
प्रत्योगिताका पुरस्कार:
प्रथम टिम : नगद २ लाख १ हजार रुपैयाँ
उपविजेता : नगद १ लाख १ हजार रुपैयाँ
तेस्रो स्थान : नगद ५१ हजार रुपैयाँ
चौथो स्थान : नगद २५ हजार रुपैयाँ
प्रतियोगिता ३ पटक जित्ने टिमले चाँदीको ट्रफी स्वामित्वमा पाउनेछ।
नगर खेलकुद विकास समितिको आयोजनामा वराहक्षेत्र नगरपालिका वडा नं ७ देबिघाटस्थित बसन्त ऋतु माध्यमिक विद्यालयको खेलमैदानमा जारी प्रतियोगिता ‘खेलकुद हाम्रो सान, खेलाडी उत्पादन गर्ने हाम्रो अभियान’ भन्ने नाराका साथ आयोजना गरिएको हो।