_1693980289.gif "#")
वराहक्षेत्र/ वराहक्षेत्र नगरपालिकामा जारी तेस्रो संस्करणको वडा स्तरीय वराहक्षेत्र मेयर लिग कप रनिङ्ग शिल्ड फुटबल प्रतियोगिता अन्तर्गत मंगलबार भएको पहिलो क्वाटरफाइनल खेलमा वडा नं १० विजयी भएको छ।
समूह ‘बी’ बाट तेस्रो हुँदै क्वाटरफाइनलको यात्रा तय गरेको वडा नं १० ले समूह ‘ए’ को विजेता वडा नं ३ लाई टाइब्रेकरमा ३–२ गोलको अन्तरले पराजित गर्दै सेमिफाइनलमा स्थान सुरक्षित गर्यो।
निर्धारित ९० मिनेटको खेल र थपिएको अतिरिक्त समयसम्म दुबै टोलीले गोलरहित बराबरी खेलेपछि खेलको निर्णय टाइब्रेकरबाट गरिएको थियो।
विजयसँगै वडा नं १० ले सेमिफाइनलको यात्रा तय गरेको छ। अब फाइनल प्रवेशका लागि उसले वडा नं २ र वडा नं ८ को विजेता टोलीसँग प्रतिस्पर्धा गर्नेछ। समूह ‘सी’ को विजेता वडा नं २ र समूह ‘बी’ बाट तेस्रो हुँदै क्वाटरफाइनल पुगेको वडा नं ८ प्रतिस्पर्धामा छन्।
पहिलो क्वाटरफाइनल खेलमा उत्कृष्ट प्रदर्शन गरेका वडा नं १० का गोलरक्षक पवन मल्ल ठकुरी ‘म्यान अफ द म्याच’ घोषित भए। उनले नगद २,१०० रुपैयाँ सहित ट्रफी प्राप्त गरे।
प्रतियोगिता अन्तर्गत बुधबार हुने दोस्रो क्वाटरफाइनल खेलमा समूह ‘बी’ को विजेता वडा नं ५ र समूह ‘सी’ को दोस्रो स्थान हासिल गरेको वडा नं ४ आमनेसामने हुनेछन्।
नगर खेलकुद विकास समितिको आयोजनामा वराहक्षेत्र नगरपालिका वडा नं ७ स्थित बसन्त ऋतु माध्यमिक विद्यालयको खेलमैदान मा जारी प्रतियोगिता "खेलकुद हाम्रो सान, खेलाडी उत्पादन गर्ने हाम्रो अभियान" भन्ने नाराका साथ सञ्चालन भइरहेको छ।
